Դատախազը հաստատել է․ Նիկոլ Փաշինյանի՝ «սատկացնելու», «չոքացնելու», «կզացնելու» արտահայտությունները քրեորեն պատժելի չեն

Նիկոլ  Փաշինյանի՝ ընդդիմադիրների նկատմամբ հնչեցրած արտահայտություններն իրավական հետևանք չեն ունենա։ Դատախազությունը հաստատել է քննիչի՝ վարույթ չնախաձեռնելու արձանագրության օրինականությունը, ինչից կարելի է հետևություն անել, որ ՀՀ  յուրաքանչյուր քաղաքացու թույլատրելի է այս խոսույթը։

Հիշեցնենք, որ վարչապետ Նիկոլ Փաշինյանը մայիսի 18-ին  քարոզարշավի ընթացքում երկու տարբեր դրվագներում վիճաբանելով արցախցի հանրային գործիչ Արթուր Օսիպյանի և  բժիշկ Արփինե Սողոյանի հետ, Հայաստանի նախկին նախագահներ՝ Սերժ Սարգսյանի, Ռոբերտ Քոչարյանի և ԱԺ առաջիկա ընտրություններին մասնակցող քաղաքական ուժերի ղեկավարներ՝ Սամվել Կարապետյանի և Գագիկ Ծառուկյանի հասցեին  «սատկացնելու, կզացնելու» վերաբերյալ հայտարարություններ էր արել: 

Դրանից հետո «Ուժեղ Հայաստան» կուսակցությունների դաշինքի պատգամավորի թեկնածու, փաստաբան Արամ Վարդևանյանը հաղորդում է ներկայացրել իրավապահներին։ Քննչական կոմիտեն, սակայն, արձանագրել է, որ Փաշինյանի հայտարարությունները հանցագործության հատկանիշներ չեն պարունակում և վարույթ չնախաձեռնելու որոշում է կայացրել , որոշման օրինականությունը հաստատելու նպատակով այն ուղարվկել է դատախազին։

Այսպիսով՝ կարող ենք արձանագրել, որ յուրաքանչյուր դեպքում, երբ կհնչեն անձին «սատկացնելու», «կզացնելու», «չոքացնելու» վերաբերյալ հայտարարություններ, իրավապահներն այս դաշտում անելիք չունեն, քանի որ այն, ինչ թույլատրելի է վարչապետ Նիկոլ Փաշինյանին, թույատրելի պետք է լինի նաև այլ քաղաքացիներին, այդ թվում՝ նախընտրական քարոզչությանը մասնակցող քաղաքական ուժերի ներկայացուցիչներին։

Արաքս Մամուլյան