Հարյուր հազարավոր մարդիկ Գերմանիայում մայիսմեկյան ցույցերի են դուրս եկել

Գերմանիայում մայիսի 1-ին հարյուր հազարավոր մարդիկ մասնակցել են լայնածավալ ցույցերի՝ բողոքելով սոցիալական ծախսերի հնարավոր կրճատումների դեմ։ Երկրի տարբեր քաղաքներում անցկացվել է ավելի քան 400 միջոցառում, որոնց մասնակցել է շուրջ 366 հազար քաղաքացի։
Ցույցերը կազմակերպվել են Գերմանական արհմիությունների միության կողմից՝ «Սկզբում մեր աշխատանքը, հետո՝ ձեր շահույթը» կարգախոսով։ Մասնակիցները զգուշացրել են իշխանություններին, որ պատրաստ են պայքարել կենսաթոշակների, սոցիալական վճարների և առողջապահական համակարգում կրճատումների դեմ։ Այս մասին տեղեկացնում է DW-ի ռուսական ծառայությունը։

Կազմակերպության ղեկավար Յասմին Ֆահիմին կոչ է արել կտրականապես մերժել 8-ժամյա աշխատանքային օրվա չեղարկման և պետական կենսաթոշակների մակարդակի նվազեցման հնարավորությունը։ Նրա խոսքով՝ երաշխավորված կենսաթոշակների նվազեցումը կարող է հանգեցնել լայնածավալ սոցիալական հակամարտության։

Միևնույն ժամանակ, Գերմանիայի իշխանությունները՝ աճող բյուջետային դեֆիցիտի պայմաններում, պատրաստվում են սոցիալական ծախսերի զգալի կրճատման։ Նախատեսվում են փոփոխություններ հատկապես առողջապահության և խնամքի ոլորտներում՝ ներառյալ պետական սուբսիդիաների նվազեցումը։

Քննարկվում է նաև քաղաքացիների վրա ֆինանսական բեռի ավելացումը՝ առողջապահական ապահովագրության վճարների բարձրացման, չաշխատող ամուսինների անվճար ապահովագրության հնարավոր չեղարկման և բուժծառայությունների համավճարների ավելացման միջոցով։ Կենսաթոշակային համակարգում ևս առաջարկվում է սահմանափակել պետական կենսաթոշակների դերը՝ խրախուսելով մասնավոր կուտակումները։

Այս միջոցառումները միտված են պետական բյուջեի ծախսերի կրճատմանը և միլիարդավոր եվրոների խնայողությանը, սակայն արդեն իսկ առաջացրել են լուրջ հանրային դժգոհություն և քննարկումներ։