10.10.2026 | 14:49
Վանաձորում, Հրազդանում, Արարատում և Գյումրիում փոշու պարունակությունը գերազանցել է թույլատրելի սահմանը
ԱՄՆ-ը ցանկանում է առաջին անգամ տեղակայել իր նորագույն գերձայնային Dark Eagle հրթիռները՝ Իրանին հնարավոր հարվածի համար
Քաղաքականություն
30.04.2026 | 15:20
ԱՄՆ Կենտրոնական հրամանատարությունը (CENTCOM) խնդրել է Մերձավոր Արևելք ուղարկել Dark Eagle գերձայնային հրթիռներ՝ Իրանին հնարավոր հարվածների համար, հաղորդում է Bloomberg-ը՝ հղում անելով աղբյուրներին։ Գործակալությունը դեռևս ԶՈւ-ում չընդունված համակարգերի տեղակայման անհրաժեշտությունը բացատրել է նրանով, որ Իրանն իր բալիստիկ հրթիռների արձակման համակարգերը տեղափոխել է երկրի ավելի խորը տարածք, ինչը դրանք անհասանելի է դարձնում ԱՄՆ այլ հրթիռների համար, գրում է Meduza-ն։
Աղբյուրի փոխանցմամբ՝ Dark Eagle-ի տեղակայման վերաբերյալ վերջնական որոշում դեռևս չի կայացվել։ Եթե Կենտրոնական հրամանատարության խնդրանքը հաստատվի, դա կնշանակի ԱՄՆ գերձայնային հրթիռների առաջին տեղակայումը։
Dark Eagle համալիրը ներկայում փորձարկման փուլում է: «Lockheed Martin»-ն այն մշակել է Չինաստանի և Ռուսաստանի առաջադեմ հակաօդային պաշտպանության համակարգերին հակազդելու համար: Գործակալությունը նշում է, որ համակարգի ճշգրիտ հնարավորությունները գաղտնի են: Հայտնի է, որ հրթիռն ունի ավելի քան 2700 կիլոմետր թռիչքի շառավիղ: Այն կարող է զարգացնել ժամում ավելի քան 6100 կիլոմետր արագություն և մանևրել՝ խուսափելով որսումից:
Dark Eagle-ի մեկ հրթիռի արժեքը գնահատվում է շուրջ 15 միլիոն դոլար: Bloomberg-ի տվյալներով՝ Միացյալ Նահանգներն նման ութ հրթիռ ունի միայն։
Այս հրթիռները տեղակայելու հետ կապված տեղեկությունը հրապարակվում է ապրիլի սկզբից Իրանի և Միացյալ Նահանգների միջև ուժի մեջ մտնող հրադադարի ֆոնին: Bloomberg-ի վերլուծաբանները կարծում են, որ երկու կողմերն էլ օգտագործում են այս դադարը՝ վերազինվելու և ապագա ռազմական գործողությունները պլանավորելու համար։
Ըստ գործակալության՝ Dark Eagle հրթիռների տեղակայումն ազդանշան է Վաշինգտոնի ռազմավարական մրցակիցներին՝ Մոսկվային և Պեկինին, որ Միացյալ Նահանգները հասել է ռազմական տեխնոլոգիաների համեմատելի մակարդակի։
Թարգմանությունը՝ Էմմա Չոբանյանի
