26.04.2026 | 19:53
Արարատ Միրզոյանը կհանդիպի Ֆրանսիայի ԱԳ նախարարին
Վարազդատ Լալայանը Հայաստանի երրորդ ոսկե մեդալը նվաճեց ծանրամարտի ԵԱ-ում
26.04.2026 | 17:56
Վարազդատ Լալայանը երրորդ տարին անընդմեջ դարձավ ծանրամարտի Եվրոպայի չեմպիոն։
Վրաստանի Բաթումի քաղաքում ավարտված Եվրոպայի առաջնության գերծանր քաշային կարգում (+110 կգ) Հայաստանի ներկայացուցիչը հաղթեց մեծ առավելությամբ։ Երկամարտում Լալայանը գրանցեց 451 կգ (210+241) արդյունք ու 26 կգ գերազանցեց երկրորդ տեղը գրաված Դանիիլ Վագաիցևին։
26-ամյա հայ ծանրորդը ոսկե մեդալներ նվաճեց նաև պոկում ու հրում վարժություններում։
Փարիզ-2024 Օլիմպիական խաղերի փոխչեմպիոն, աշխարհի կրկնակի չեմպիոն Վարազդատ Լալայանը կարիերայի 6-րդ մեդալը նվաճեց Եվրոպայի առաջնություններում։ 2021-ին նա դարձել էր բրոնզե մեդալակիր, 2022-ին ու 2023-ին՝ արծաթե մեդալակիր, իսկ 2024-ին ու 2025-ին՝ չեմպիոն։
Հայաստանը Եվրոպայի առաջնությունում մրցելույթն ավարտեց երկամարտի 8 մեդալով՝ 3 ոսկե, 4 արծաթե, 1 բրոնզե։ Ավելի վաղ Էմմա Պողոսյանը (60 կգ) և Գարիկ Կարապետյանը (110 կգ) նվաճել էին Եվրոպայի չեմպիոնի կոչումը, Եվրոպայի փոխչեմպիոն էին դարձել Ալեքսանդրա Գրիգորյանը (58 կգ), Գառնիկ Չոլաքյանը (60 կգ), Գոռ Սահակյանը (71 կգ) և Արա Աղանյանը (94 կգ), իսկ Մարտին Պողոսյանը (71 կգ) արժանացել էր բրոնզե մեդալի։
Հայաստանի հավաքականը ԵԱ-ին մասնակցեց 16 ծանրորդով՝ 8-ական տղամարդկանց ու կանանց պայքարում։
