25.04.2026 | 15:08
Ըմբշամարտի ԵԱ․ Արսեն Հարությունյանը երկու տպավորիչ հաղթանակով դուրս եկավ կիսաեզրափակիչ
Նորվեգիայում մինչև 16 տարեկան երեխաներին կարգելվի օգտագործել սոցիալական ցանցերը
Քաղաքականություն
25.04.2026 | 12:51
Նորվեգիայի կառավարությունը մտադիր է մինչև 2026 թվականի վերջ խորհրդարան ներկայացնել օրենքի նախագիծ, որը սոցիալական ցանցերի օգտատերերի համար կսահմանի տարիքային սահմանափակում։ Այս մասին ասվում է ապրիլի 24-ին՝ ուրբաթ օրը, կառավարության կայքում հրապարակված մամուլի հաղորդագրության մեջ, փոխանցում է DW-ն։
«Մենք ներդնում ենք այս օրենսդրությունը, որովհետև ցանկանում ենք, որ մանկությունը մնա մանկություն։ Խաղերը, ընկերությունն ու առօրյա կյանքը չպետք է «գրավվեն» ալգորիթմների և էկրանների կողմից։ Սա կարևոր քայլ է երեխաների թվային կյանքի պաշտպանության համար»,- հայտարարել է Նորվեգիայի վարչապետ Յոնաս Գար Ստյորեն՝ Աշխատավորական կուսակցությունից։
Նախատեսվում է, որ սահմանափակումը կհանվի այն տարվա հունվարի 1-ից, երբ երեխան պետք է դառնա 16 տարեկան։
«Սա նշանակում է, որ մուտքը կտրամադրվի միաժամանակ ամբողջ դպրոցական խմբերին, և հասանելիության պահին աշակերտները կլինեն առնվազն 15 տարեկան»,- պարզաբանվում է Օսլոյի կառավարության հաղորդագրության մեջ։
«Ես ակնկալում եմ, որ տեխնոլոգիական ընկերությունները կապահովեն տարիքային սահմանափակման պահպանումը։ Չի կարելի երեխաների վրա դնել պատասխանատվություն՝ չմտնել այն հարթակներ, որոնց օգտագործումն իրենց արգելված է»,- հայտարարել է թվայնացման և պետական կառավարման նախարար Կարիաննե Թունգը։ Նա հավելել է, որ ընկերությունները պետք է ներդնեն արդյունավետ տարիքային ստուգման համակարգ և «օրենքը պահպանեն առաջին իսկ օրվանից»։
Երեխաների և ընտանիքի հարցերով նախարար Լենե Վոգսլիդը հիշեցրել է, որ մի շարք եվրոպական երկրներ՝ Ֆրանսիան, Դանիան, Իսպանիան և Պորտուգալիան, նույնպես քննարկում են նման միջոցառումներ, իսկ ԵՄ-ն «հստակ աջակցություն է ցուցաբերում ավելի խիստ կարգավորմանը»։
«Մենք գտնվում ենք Եվրոպայում առաջատար դիրքերում և մտադիր ենք այնտեղ մնալ»,- նշել է նա։
