Հեգսեթը հայտարարել է՝ Եվրոպան Հորմուզի նեղուցի կարիքն ավելի շատ ունի

ԱՄՆ պատերազմի նախարար Փիթ Հեգսեթը լրագրողների հետ ճեպազրույցում հայտարարել է, որ ԱՄՆ-ի կողմից Իրանի նավահանգիստների ռազմածովային շրջափակումն «ընդլայնվում է և դառնում է գլոբալ», գրում է CNN-ը։

«Ոչ ոք Հորմուզի նեղուցից չի նավարկում աշխարհի որևէ վայր առանց Միացյալ Նահանգների ռազմածովային ուժերի թույլտվության»,- ասել է Հեգսեթը՝ հավելելով, որ առաջիկա օրերին շրջափակմանը կմիանա ևս մեկ ավիակիր։

Շրջափակման հաջողությունը գովաբանելով՝ նա նշել է այս շաբաթ ԱՄՆ-ի կողմից երկու նավերի առգրավումը «Հնդկա-խաղաղօվկիանոսյան տարածաշրջանում, որոնք լքել էին իրանական նավահանգիստները նախքան շրջափակման ուժի մեջ մտնելը»։

«Նրանք կարծում էին, որ ժամանակին են դուրս եկել։ Բայց այդպես չեղավ: Մենք առգրավեցինք նրանց պատժամիջոցների տակ գտնվող նավերը և կառգրավենք ավելին»,- ասել է նա։

Հեգսեթը նաև քննադատել է եվրոպացի դաշնակիցներին՝ Իրանի դեմ պատերազմում ԱՄՆ-ին բավարար չափով չօգնելու համար՝ ասելով, որ ԱՄՆ-ը «հազիվ» է օգտագործում Հորմուզի նեղուցը, և որ իրավիճակն «ավելի շատ նրանց պայքարն է»։

«Մենք հույսներս չենք դնում Եվրոպայի վրա, բայց նրանք Հորմուզի նեղուցի կարիքն ավելի շատ են ունենում, քան մենք, և գուցե ցանկանան սկսել ավելի քիչ խոսել, ավելի քիչ շքեղ համաժողովներ անցկացնել Եվրոպայում և նավ նստել։ Սա ավելի շատ նրանց պայքարն է, քան մերը»,- հայտարարել է ամերիկացի պաշտոնյան։

Հեգսեթն ու ԱՄՆ նախագահ Դոնալդ Թրամփը բազմիցս քննադատել են ԱՄՆ դաշնակիցներին, մասնավորապես, ՆԱՏՕ-ի անդամներին, փետրվարի 28-ին Իրանի դեմ մարտական ​​գործողությունները սկսելուց հետո ԱՄՆ-ին օգնության չհասնելու համար։ Անցյալ ամիս Թրամփը քննադատել էր  եվրոպացի դաշնակիցներին՝ ասելով, որ ԱՄՆ-ն «իրականում որևէ օգնության կարիք չունի», այն բանից հետո, երբ պնդել էր, որ մյուս երկրները պետք է ռազմածովային ուժեր ուղարկեն Հորմուզի նեղուցով անցնող նավերին ուղեկցելու համար։

Հեգսեթը նաև հայտարարել է, որ Իրանն ունի «պատմական հնարավորություն լուրջ գործարք կնքելու» ԱՄՆ-ի հետ՝ փետրվարի 28-ին սկսված ռազմական գործողությունները դադարեցնելու համար, ասելով, որ «գնդակը նրանց դաշտում է»։

Թարգմանությունը՝ Էմմա Չոբանյանի