20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Թուրքիայի՝ «Միջին միջանցք» ծրագրի իրականացման կարևորագույն բաղադրիչը Հայաստանի հետ սահմանի բացումն է. FT
Քաղաքականություն
20.04.2026 | 21:45
Թուրքիան արագացնում է Ասիան և Եվրոպան կապող ռազմավարական առևտրային հանգույցի դերում դիրքավորվելու ջանքերը՝ առաջ մղելով «Միջին միջանցքը» որպես ծովային խոչընդոտների ցամաքային այլընտրանք, ինչպիսին է Հորմուզի նեղուցը։ Այս մասին ասվում է Financial Times-ի հրապարակման մեջ, փոխանցում է PA Turkey-ն։
Նշվում է, որ մինչ աշխարհաքաղաքական ցնցումները մեծացնում են երթուղու գրավչությունը, դեռևս մնում են զգալի լոգիստիկ և քաղաքական մարտահրավերներ։ Թուրքիան ակտիվացնում է ջանքերը՝ իրեն որպես համաշխարհային առևտրի և էներգետիկ հոսքերի կարևորագույն տարանցիկ կենտրոն ներկայանալու համար։ Այս ռազմավարության կենտրոնում է «Միջին միջանցքը»՝ ցամաքային առևտրային երթուղի, որը Չինաստանը կապում է Եվրոպայի հետ Կովկասի և Թուրքիայի միջոցով։
Ընդգծվում է, որ ծրագրի կարևորագույն բաղադրիչներից մեկը Թուրքիայի և Հայաստանի միջև երկար ժամանակ փակ ցամաքային սահմանի հնարավոր վերաբացումն է։
Ալիջան սահմանային անցակետը, որը փակ է 1993 թվականից, վերջերս ենթարկվել է տեխնիկական արդիականացման, այդ թվում՝ անձնագրերի մշակման համակարգերի տեղադրման։ Վերաբացման դեպքում այն կբացի Թուրքիան Ադրբեջանի հետ կապող ուղիղ ցամաքային երթուղի՝ Հայաստանի տարածքով։
Այս երթուղին ԱՄՆ-ի կողմից աջակցվող ավելի լայն նախաձեռնության մաս է կազմում, որը հայտնի է որպես «Թրամփի ուղի միջազգային խաղաղության և բարգավաճման համար» (TRIPP), որի նպատակն է աջակցել Հայաստանի և Ադրբեջանի միջև հարաբերությունների կարգավորմանը՝ միաժամանակ խթանելով տարածաշրջանային կապը։
Միաժամանակ, նշվում է, որ Միջին միջանցքի, և հատկապես TRIPP նախագծի հաջողությունը կախված կլինի Հայաստանի և Ադրբեջանի միջև քաղաքական համաձայնություններից, ԱՄՆ-ի կայուն աջակցությունից, ենթակառուցվածքային ներդրումներից, տարածաշրջանային կայունությունից։
Թարգմանությունը՝ Էմմա Չոբանյանի
