«Վրացական երազանքը» կպահանջի արգելել ևս մեկ ընդդիմադիր կուսակցության գործունեությունը

Ապրիլի 20-ին Վրաստանի  իշխող «Վրացական երազանք» կուսակցությունը մտադիր է նոր հայց ներկայացնել Սահմանադրական դատարան՝ արմատական ընդդիմադիր կուսակցություններն արգելելու համար, հայտարարել է խորհրդարանի խոսնակ Շալվա Պապուաշվիլին։

Նրա խոսքով՝ նախկինում ներկայացված հայցը հետ կվերցվի, իսկ թարմացված տարբերակը կընդլայնի կուսակցությունների ցանկը՝ ներառելով նաև «Ֆեդերալիստներ» կուսակցությունը։

Անցյալ տարվա հոկտեմբերի 31-ին «Վրացական երազանքը» պահանջել էր արգելել 2024 թվականի խորհրդարանական ընտրությունների ընտրական շեմը հաղթահարած երեք ընդդիմադիր խմբավորումների գործունեությունը՝ «Միասնություն – Ազգային շարժում», «Փոփոխությունների համար կոալիցիա», «Ուժեղ Վրաստան – Լելո»: Այժմ, ըստ Պապուաշվիլիի, դատական ​​հայցին միանում է նաև Գիգա Բոկերիայի և Թամար Չերգոլեիշվիլիի գլխավորած «Ֆեդերալիստներ» կուսակցությունը:

Ըստ խոսնակի՝ որոշումը պայմանավորված է նրանով, որ այս քաղաքական ուժերը, ըստ իշխանությունների, մասնակցել են «հակասահմանադրական գործողությունների», այդ թվում՝ ընտրություններն անօրինականացնելու և պետական ​​ինստիտուտները չճանաչելու փորձերին։ Պապուաշվիլին նաև նշել է, թե ինչու է հայցը հատկապես ներառել Ֆեդերալիստներին, այլ ոչ թե ընդդիմադիր դաշինքի բոլոր կուսակցություններին․ ըստ նրա՝ հաշվի են առնվել ինչպես կուսակցությունների նպատակները, այնպես էլ նրանց ազդեցությունը քաղաքական գործընթացների վրա։

Մեկնաբանելով Պապուաշվիլիի հայտարարությունը՝ Թամար Չերգոլեիշվիլին նշել է, որ կուսակցությունը, միևնույն է, չէր մասնակցելու խորհրդարանական ընտրություններին, եթե այլ ընդդիմադիր ուժերին, այդ թվում՝ «Ազգային շարժմանը», չթույլատրվեր մասնակցել։ Նա «Վրացական երազանքի» նոր հայցը պայմանավորում է Սահմանադրական դատարանում գործերի վերանայման 9-ամսյա ժամկետով։ Նրա խոսքով՝ իշխանությունները սպառում են երեք կուսակցություններն արգելելու համար անհրաժեշտ ժամանակը, և «Ֆեդերալիստների» ավելացմամբ կսկսվի նոր 9-ամսյա ժամկետը։

«Սա ռեժիմի թուլության ցուցադրություն է, ուրիշ ոչինչ»,- ասել է նա։

Վրաստանի վարչապետ Իրակլի Կոբախիձեն սահմանադրական հայցը վերանայելու ծրագրերի մասին հայտարարել էր դեռևս մարտի սկզբին։

Նախնական հայցում «Վրացական երազանքը» պնդում էր, որ ընդդիմադիր կուսակցությունները դիվերսիաներ են իրականացրել պետության դեմ և գործել են միասնական քաղաքական դիրքորոշմամբ։

Մարտի 2-ին մի քանի ընդդիմադիր ուժեր, այդ թվում՝ «Ֆեդերալիստները», դաշինք կազմեցին։ Նրանք հայտարարեցին համակարգված գործողությունների, համատեղ բողոքի ռազմավարության և քաղբանտարկյալների ազատ արձակման ու ազատ ընտրություններ անցկացնելու մտադրության մասին։

Թարգմանությունը՝ Էմմա Չոբանյանի