Բուլղարիայի ընտրություններում առաջատարը նախկին նախագահ Ռումեն Ռադևի կոալիցիան է․ նա ՌԴ-ի հետ երկխոսության կողմնակից է

Բուլղարիայի խորհրդարանական ընտրություններում առաջատարը նախկին նախագահ Ռումեն Ռադևի գլխավորած «Առաջադեմ Բուլղարիա» կենտրոնամետ կոալիցիան է։ Այս մասին են վկայում ապրիլի լույս 20-ի գիշերը հրապարակված նախնական արդյունքները քվեաթերթիկների մեկ երրորդի մշակումից հետո, գրում է DW-ի ռուսական ծառայությունը։

Այդ տվյալների համաձայն՝ «Առաջադեմ Բուլղարիան» ստացել է ընտրողների 44,59%-ի աջակցությունը: Նախկին վարչապետ Բոյկո Բորիսովի գլխավորած «Քաղաքացիները Բուլղարիայի եվրոպական զարգացման համար»կենտրոնամետ աջակողմյան կուսակցությունը և «Շարունակում ենք փոփոխությունները. ժողովրդավարական Բուլղարիա» լիբերալ դաշինքը 12-13% արդյունք են գրանցել:

Հինգ կուսակցություններ հնարավորություն ունեն հաղթահարելու անցողիկ 4%-ի շեմը: Ընտրություններին մասնակցությունը  կազմել է 43.4%:

Սրանք Բուլղարիայում վերջին հինգ տարիների ընթացքում անցկացվող ութերորդ խորհրդարանական ընտրություններն են։ Ներկայիս արտահերթ ընտրությունները նշանակվել են պահպանողականների գլխավորած կառավարության հրաժարականից հետո, որը տեղի է ունեցել 2025 թվականի դեկտեմբերին երկրում սկսված զանգվածային բողոքի ցույցերի ֆոնին։ Հարյուր հազարավոր մարդիկ դուրս էին  եկել փողոցներ՝ պահանջելով անկախ դատական ​​համակարգ և կոռուպցիայի վերացում։

Ռումեն Ռադևի դաշինքը կոռուպցիայի դեմ պայքարը դարձրել է իր նախընտրական քարոզարշավի կենտրոնական թեման։ Դիտորդները նշում են, որ այս կոալիցիայի կողմնակիցների կեսը ռուսամետ քաղաքացիներ են, մինչդեռ մյուս կեսը մտահոգված է կոռուպցիայով։ Բացի այդ, նախկին նախագահին աջակցում են բազմաթիվ ընտրողներ, որոնք նախկինում քվեարկել են Բուլղարիայի սոցիալիստական ​​կուսակցության օգտին՝ 45 տարի իշխանությունը զբաղեցրած կոմունիստների իրավահաջորդին։ Ըստ AFP-ի՝ Ռադևը կողմ է Ուկրաինային տրամադրվող ռազմական օգնության կրճատմանը։

Նախընտրական քարոզարշավի ժամանակ նախկին նախագահը խոստացել էր պայքարել կոռուպցիայի դեմ և երկխոսություն հաստատել Ռուսաստանի հետ։ Ռադևը դեմ էր հանես գալիս Բուլղարիայի եվրագոտու անդամակցությանը և Ուկրաինային ռազմական օգնության ավելացմանը։