Իսրայելը հայտարարել է, որ Լիբանանում հարձակումը «դեռևս ավարտված չէ»

Իսրայելի պաշտպանության նախարար Իսրայել Կացը զգուշացրել է, որ իսրայելական ուժերը կարող են շարունակել Լիբանան ցամաքային ներխուժումը և օդային ռմբակոծությունը 10-օրյա հրադադարի ժամկետի ավարտից հետո, գրում է DW-ն։

«Լիբանանում ցամաքային մանևրը և «Հըզբոլլահ»-ի թիրախների վրա հարվածները բազմաթիվ հաջողությունների են հասել, բայց դրանք դեռևս ամբողջական չեն»,- ասել է նա։

Կացը Լիբանանի հետ 10-օրյա հրադադարը որակել է որպես «ժամանակավոր սառեցում» և ասել, որ Իսրայելը կհետևի իր պատերազմական նպատակին՝ զինաթափել Իրանի հետ կապված «Հըզբոլլահ» զինյալ խմբավորումը։ Ըստ նրա՝ «Լիբանանի կառավարության վրա ճնշում գործադրելու» միջոցով Միացյալ Նահանգների օգնությամբ «Հըզբոլլահ»-ը քանդելու նպատակի մեջ ի հայտ է եկել «նշանակալի դիվանագիտական ​​լծակ»։

Կացը նշել է, որ հարավային Լիբանանի և Բեյրութի բնակիչները, որոնք ստիպված էին լքել իրենց տները մարտերի պատճառով, կարող են ստիպված լինել կրկին տարհանվել։

«Եթե մարտերը վերսկսվեն, անվտանգության գոտի վերադարձող բնակիչները պետք է տարհանվեն՝ առաքելությունն ավարտելու համար»,- ասել է իսրայելցի նախարարը։

Բացի այդ, հինգշաբթի  մի շարք լրատվական գործակալություններ հաղորդել էին, որ Իսրայելի օդային հարվածները Լիբանանի հարավային Տյուր քաղաքի վրա խլել են առնվազն 13 մարդու կյանք։ Լիբանանի պաշտոնական NNA լրատվական գործակալությունը հայտնել է, որ հարձակումների հետևանքով վիրավորվել է շուրջ 35 մարդ, իսկ 15-ը դեռևս փլատակների տակ է և անհետ կորած է համարվում։

Ֆրանսիական AFP լրատվական գործակալությունը, հղում անելով քաղաքային պաշտոնյային, հայտնել է, որ հարվածներն ուղղված են եղել վեց բնակելի շենքերի, որոնք ավերվել են։

Թարգմանությունը՝ Էմմա Չոբանյանի