05.10.2026 | 13:08
Պեկին. Ալինա Չարաևան շարժվում է առաջ. ՏԵՍԱՆՅՈՒԹ
Փաշինյանը չափազանցնում է․ թոշակառուն Գյումրի-Լառնակա 5 ավիատոմս չի կարող գնել
Քաղաքականություն
16.04.2026 | 14:24
Երեկ ԱԺ-ում պատգամավորների հարցերին պատասխանելիս Նիկոլ Փաշինյանը չափազանցված պնդում է արել Գյումրի-Լառնակա ավիատոմսերի գների մասին։ Նրա ասածի մի մասը ճիշտ է, մյուս մասը՝ խիստ չափազանցված։
«Կիրակի օրվա համար դեպի Լառնակա 2 եվրոյով տոմս կա։ Այսինքն 900 դրամով Գյումրի-Լառնակա ավիատոմս կա», – նշել է Փաշինյանը։
Սա իրականություն է․ապրիլի 15-ին ցերեկվա դրությամբ ապրիլի 19-ի թռիչքի տոմսերը 2,19 եվրոյով էին վաճառվում Wizzair-ի կայքում (երեկ երեկոյան գները բազմապատիկ բարձրացել էին)։ Բայց սա մեկ ուղղությամբ թռիչքի գինն է։ Հետադարձ թռիչքների գները շատ ավելի բարձր են։ Եվ հենց այստեղ է, որ Փաշինյանի հետագա հաշվարկը շեղվում է իրականությունից և գերագնահատում է թոշակառուների հնարավորությունը։ «Այսինքն, ապրիլի 1-ից մեր բարձրացրած թոշակով թոշակառուն կարող է 5 հատ «տուդա-աբռատնը» տոմս առնի», – պնդել էր Փաշինյանը։
Իրականությունն այն է, որ կիրակի օրվա հաջորդող հետադարձ թռիչքների գները երեկոյան արդեն 24 եվրոյի սահմաններում էին։ Այսինքն Փաշինյանի ասած «տուդա-աբռատնը» կամ երկկողմանի միայն մեկ տոմսը երեկոյան արժեր 26,18 եվրո։ Եվ թոշակների բարձրացված մասը բավարար չէր լինի երկկողմանի 5 տոմս գնելու համար։
Հիշեցնենք, որ կառավարության որոշմամբ՝ ապրիլի 1-ից սահմանվել են թոշակների նոր շեմեր, մասնավորապես, նվազագույն կենսաթոշակի չափը ավելացել է 10 հազար դրամով։
Միևնույն ժամանակ, պետք է նշել, որ ավիատոմսերի այս գները ձևավորվում են պետական սուբսիդավորումից հետո։ Կառավարությունը սահմանել է, որ որոշակի պայմանների բավարարելու դեպքում Գյումրիի «Շիրակ» օդանավակայանից նոր ուղղությամբ թռիչքների տոմսերը սուբսիդավորվում են 15 հազար դրամով, իսկ Երևանի «Զվարթնոցից» թռիչքները՝ 20 հազար դրամով։
Եվ այս սուբսիդավորման համար, ըստ ՏԿԵ նախարարի հայտարարության, 2026 թվականի համար նախատեսվել է 3 մլրդ դրամ։ Ասել է թե՝ տոմսերի գները նվազեցնելու հարցում զգալի դերակատարում է ունեցել հարկատուների միջոցներից ձևավորվող պետական բյուջեից հատկացված ֆինանսավորումը։
Գարիկ Հարությունյան
