ԱՄՆ Սենատը մերժել է Իրանի հետ պատերազմը դադարեցնելու վերաբերյալ բանաձևը

ԱՄՆ Սենատը չի աջակցել բանաձևին, որը, ըստ էության, պարտավորեցնում էր նախագահ Դոնալդ Թրամփի վարչակազմին դադարեցնել Իրանի դեմ ռազմական գործողությունները և դուրս բերել ամերիկյան զորքերը հակամարտության գոտուց՝ մինչև Կոնգրեսի կողմից ուժի հետագա կիրառման պաշտոնական հաստատումը, գրում է DW-ի ռուսական ծառայությունը։

Դեմոկրատական ​​կուսակցության ներկայացուցիչների կողմից ներկայացված բանաձևը ստացել է 47 կողմ, 52 դեմ ձայն։ Հանրապետական ​​կուսակցությունն այժմ վերահսկում է Կոնգրեսի վերին պալատը, որը մեծապես կանխորոշել է քվեարկության արդյունքը։

Բանաձևի դեմոկրատ ​աջակիցները պնդում են, որ Իրանի դեմ ռազմական արշավն անօրինական է և չունի բավարար հիմնավորումներ: Նրանք հայտարարել են իրենց մտադրության մասին՝ շարունակել նմանատիպ նախաձեռնություններ ներկայացնել Սենատ՝ մինչև հակամարտությունը չավարտվի:

AP-ն նշում է, որ սա 2026 թվականի սկզբից ի վեր չորրորդ դեպքն է, երբ Սենատը փաստացի քվեարկել է ռազմական որոշումների ոլորտում իր սահմանադրական լիազորությունների ակտիվ կիրառումից հրաժարվելուն կողմ՝ հօգուտ նախագահի։ 1973 թվականի Պատերազմական լիազորությունների մասին օրենքը պահանջում է, որ Կոնգրեսը պատերազմ հայտարարի կամ պաշտոնապես թույլատրի ուժի կիրառումը ռազմական գործողությունների սկսվելուց հետո 60 օրվա ընթացքում: Այս ժամկետը լրանում է ապրիլի վերջին, սակայն օրենսդրությունը թույլ է տալիս այն երկարացնել 30 օրով:

Օրենսդիրների խոսքով՝ Կոնգրեսը սպասում է, որ Դոնալդ Թրամփի վարչակազմը շուտով կներկայացնի հակամարտության կարգավորման և հնարավոր ապաէսկալացիայի քայլերի ավելի մանրամասն ծրագիր: Միևնույն ժամանակ, ռազմական ուժի կիրառման վերաբերյալ որոշումների կայացման գործում Կոնգրեսի դերի շուրջ բանավեճը մնում է ներքաղաքական օրակարգի հիմնական թեման, ընդգծում են ամերիկյան լրատվամիջոցները:

Թարգմանությունը՝ Էմմա Չոբանյանի