05.06.2026 | 12:13
Արմեն Աշոտյանը ձերբակալվել է, Արման Սահակյանը՝ կալանավորվել // Զելենսկին բաց նամակ է հղել Պուտինին․ ԼՈՒՐԵՐ
Մոսկվան ու Բաքուն համաձայնության են եկել․ կողմերը հայտարարություն են տարածել AZAL-ի ինքնաթիռի վթարի հետ կապված
Քաղաքականություն
15.04.2026 | 17:38
2025 թվականի հոկտեմբերի 9-ին Դուշանբեում Ադրբեջանի Հանրապետության և Ռուսաստանի Դաշնության նախագահների հանդիպման ժամանակ ձեռք բերված պայմանավորվածության համաձայն՝ կողմերը համաձայնել են պատշաճ կերպով լուծել ավիավթարից բխող հարցերը, այդ թվում՝ փոխհատուցման վճարումը, որը կապված է 2024 թվականի դեկտեմբերի 25-ին Ակտաուի մոտակայքում «Ադրբեջանական ավիաուղիներ»-ի (AZAL) Embraer-190 ինքնաթիռի վթարի հետ։ Այն տեղի է ունեցել Ռուսաստանի Դաշնության օդային տարածքում ՀՕՊ համակարգի ոչ միտումնավոր գործողության հետևանքով։ Ադրբեջական լրատվամիջոցների հաղորդմամբ՝ այս մասին ասվում է Ադրբեջանի ԱԳՆ-ի և ՌԴ ԱԳՆ-ի համատեղ հայտարարության մեջ։
«Ձեռնարկված քայլերը ցույց են տալիս կողմերի համատեղ ջանքերը՝ փոխշահավետ համագործակցությունը զարգացնելու իրենց դաշնակցային գործընկերության շրջանակներում։ Մենք վստահ ենք, որ ադրբեջանա-ռուսական հարաբերությունների կայուն զարգացումը՝ հիմնված փոխադարձ հարգանքի, վստահության և միմյանց շահերը հաշվի առնելու վրա, կշարունակի ամրապնդել բարիդրացիական կապերը և ընդլայնել համագործակցությունը՝ ի շահ երկու երկրների ժողովուրդների։ Մենք կրկին մեր խորին ցավակցությունն ենք հայտնում ինքնաթիռի վթարի հետևանքով զոհվածների ընտանիքներին և սիրելիներին և կիսում ենք այս անդառնալի կորստի ցավը ողբերգությունից տուժած բոլորի հետ»,- ասվում է հայտարարության մեջ։
Հիշեցնենք, որ 2024 թվականի դեկտեմբերի 25-ին Ակտաուի մոտակայքում վթարի է ենթարկվել «Ադրբեջանի ավիաուղիներ» ընկերության Embraer 190 ինքնաթիռը, որը Բաքվից Գրոզնի էր թռչում։ Ինքնաթիռում եղել է 67 մարդ՝ Ադրբեջանի, Ռուսաստանի, Ղազախստանի և Ղրղզստանի քաղաքացիներ։ Վթարի հետևանքով զոհվել է 38 մարդ, իսկ 29-ը՝ ողջ են մնացել։
Նախնական տվյալներով՝ Գրոզնիին մոտենալիս ինքնաթիռը, հնարավոր է, խոցվել է ՀՕՊ համակարգերի կողմից։
Թարգմանությունը՝ Էմմա Չոբանյանի
