14.04.2026 | 23:28
Կրեմլը վերանայում է ինտերնետի սահմանափակումների նկատմամբ մոտեցումը՝ վախենալով Պուտինի վարկանիշի անկումից․ Bloomberg
Մակրոնը ԱՄՆ և Իրանի նախագահներին կոչ է արել վերսկսել բանակցությունները
Քաղաքականություն
14.04.2026 | 18:35
Ֆրանսիայի նախագահ Էմանուել Մակրոնը հայտարարել է, որ խոսել է Իրանի նախագահ Մասուդ Փեզեշքիանի և ԱՄՆ նախագահ Դոնալդ Թրամփի հետ ու կոչ արել վերսկսել բանակցությունները, դադարեցնել ցանկացած հնարավոր սրացում, գրում է France24-ը։
X սոցիալական ցանցում գրառման մեջ նա հավելել է, որ Հորմուզի նեղուցը պետք է անվերապահորեն վերաբացվի։
«Այս պայմաններում բանակցությունները պետք է կարողանան արագ վերսկսվել՝ հիմնական շահագրգիռ կողմերի աջակցությամբ։ Ես կոչ արեցի վերսկսել Իսլամաբադում կասեցված բանակցությունները, պարզաբանել թյուրըմբռնումները և խուսափել հետագա սրացումից։ Մասնավորապես, կարևոր է, որ հրադադարը խստորեն պահպանվի բոլոր կողմերի կողմից և այն ներառի նաև Լիբանանը»,- գրել է Ֆրանսիայի նախագահը X-ում։
Ըստ նրա՝ նույնքան կարևոր է, որ Հորմուզի նեղուցը հնարավորինս շուտ վերաբացվի՝ առանց սահմանափակումների կամ վճարների։ Մակրոնը նաև հայտնել է, որ Ֆրանսիան և Միացյալ Թագավորությունն այս ուրբաթ Փարիզում համաժողով կանցկացնեն, որը տեսակոնֆերանսի միջոցով կմիավորի ոչ պատերազմող երկրներին, որոնք պատրաստ են իրենց հետ միասին նպաստել բազմակողմանի և զուտ պաշտպանական առաքելությանը՝ ուղղված նեղուցում նավարկության ազատության վերականգնմանը, երբ անվտանգության պայմանները թույլ տան։
Ավելի վաղ հաղորդվել էր, որ ԱՄՆ-ը դիտարկում է Իրանի հետ բանակցությունների երկրորդ փուլի հնարավորությունը։
Թարգմանությունը՝ Էմմա Չոբանյանի
