Խաղաղության հաստատման ուղղությամբ տարվող աշխատանքները երաշխավորված չեն հաջողությամբ, բայց եթե չտարվեն, խաղաղություն երբեք չի լինի. Քոչինյան․ ՏԵՍԱՆՅՈՒԹ

Որևէ մեկը չի կարող երաշխիք տալ խաղաղության գործընթացի հաջողել-չհաջողելու վերաբերյալ․ դա կապված է բազմաթիվ գործընթացների հետ։ Այդ մասին մամուլի ասուլիսի ժամանակ ասաց «Հայկական խորհուրդ» վերլուծական կենտրոնի նախագահ, Ադրբեջան մեկնած հայ փորձագետների պատվիրակության անդամ Արեգ Քոչինյանը: 

«Մի բան ուղղակի հաստատ է, որ թե՛ մեր աշխատանքը, թե՛ մնացած աշխատանքները, որոնք տարվում են խաղաղության հաստատման ուղղությամբ, երաշխավորված չեն հաջողության, բայց երաշխավորված է, որ եթե այդ աշխատանքները չեն տարվում, ապա խաղաղություն երբեք չի լինելու»,- ասաց Քոչինյանը։

Նա նշեց, որ «Խաղաղության կամուրջ» նախաձեռնության հանդիպումները նախկինում տեղի են ունեցել 5+5 ձևաչափով: Սկզբից ադրբեջանական կողմի ներկայացուցիչներն էին ժամանել Երևան, հետո հայկական կողմը 5 հոգանոց կազմով այցելել էր Բաքու: Երկրորդ փուլում ընդլայնվել է ներգրավվածությունը, և հանդիպումները ինչպես Ծաղկաձորում, այնպես էլ Գաբալայում, տեղի են ունեցել 20+20 ձևաչափով։  

Քոչինյանի կարծիքով՝ այն փաստը, որ տեղի է ունեցել այդ ձևաչափով չորրորդ հանդիպումը, և կա հստակ պայմանավորվածություն, որ հանդիպումները շարունակվելու են, արդեն իսկ բավականին մեծ ձեռքբերում է: 

«Ես կարծում եմ, որ մենք չենք կարող այս ֆորմատից ունենալ ինչ-որ գերադրական աստիճանի ակնկալիքներ, որ 38 տարվա կոնֆլիկտից հետո փորձագետների, քաղհասարակության, մեդիաներկայացուցիչների 4 հանդիպումների արդյունքում մեծ բաներ պետք է փոխվեն հասարակության մեջ, բայց փաստը, որ այդ հանդիպումները տեղի են ունենում, դրանք ընդլայնվում են, շարունակվում են, ես կարծում եմ՝ բավականին կարևոր է»,- նշեց Արեգ Քոչինյանը: 

Նրա դիտարկմամբ՝ կարող են հարյուրավոր պատճառներ լինել, թե ինչու հայկական կողմը չգնա Ադրբեջան և ինչու ադրբեջանական կողմի պատվիրակները չպետք է գան Հայաստան, սակայն, ըստ Քոչինյանի, այդ այցելությունները պետք է տեղի ունենան, որովհետև դրանք նպաստում են խաղաղության օրակարգի առաջմղմանը։ 

«Մեզ հետ հանդիպումներում թե՛ Հայաստանի, թե՛ Ադրբեջանի ղեկավարությունը վստահեցնում են, հորդորում են, համոզում են, որ Հայաստանի և Ադրբեջանի միջև արդեն իսկ կա խաղաղություն, խաղաղությունն արդեն իսկ հաստատվել է, այդ խաղաղությունը հիմա ընդլայնման, խորացման փուլում է: Սա երևի թե կարևոր է, որովհետև մենք շատ հաճախ, խոսելով դետալներից, պրոցեսից, մեր ամենօրյա լրահոսից, ընդհանուր պատկերն ինչ-որ չափով լղոզում ենք կամ մոռանում ենք»,- ընդգծեց Արեգ Քոչինյանը: 

Հիշեցնենք, որ 2026 թվականի ապրիլի 10-12-ը, «Խաղաղության կամուրջ» նախաձեռնության շրջանակներում, Ադրբեջանի և Հայաստանի քաղաքացիական հասարակության ներկայացուցիչների մասնակցությամբ Ադրբեջանում տեղի է ունեցել հերթական երկկողմ կլոր սեղանը։ 

Մանրամասները՝ տեսանյութում։