Կուբանը ԱԹՍ-ների հարձակման է ենթարկվել. Կրիմսկում նավթաբազա է այրվում

ՌԴ  պաշտպանության նախարարությունը հայտնել է լույս ապրիլի 9-ի գիշերը Կուրսկի և Աստրախանի մարզերի, Կրասնոդարի երկրամասի և Ազովի ծովի վրա ուկրաինական 69 անօդաչու թռչող սարքերի խոցման մասին, գրում է Current time-ը։

Կրասնոդարի երկրամասի Կրիմսկի շրջանի Սաուկ-Դերե գյուղում անօդաչու թռչող սարքերի հարձակման հետևանքով զոհվել է մեկ տղամարդ։ Նահանգապետ Վենիամին Կոնդրատևը հայտարարել է, որ նա զոհվել է «անօդաչու թռչող սարքերի բեկորներից», երբ կանգնած է եղել բնակելի շենքի պատշգամբում։

«Ոչնչացված անօդաչու թռչող սարքերի բեկորները նաև ընկել են Կրիմսկի ծայրամասում գտնվող դաշտում և մի ձեռնարկության տարածքում։ Դրանք նաև ընկել են Մոլդավանսկոյե գյուղի փողոցների մի քանի հասցեներում։ Այլ դեպքերում վիրավորներ կամ վնասներ չեն եղել», – գրել է նա։

Astra-ի տվյալներով՝ անօդաչու թռչող սարքերը հարձակվել են Ղրիմի գծային արտադրական-դիսպետչերական կայանի (LPDS) վրա, և հրդեհ է բռնկվել ենթակայանում։ Սա նավթատարի ենթակառուցվածքային օբյեկտ է, որը «Չեռնոմորտրանսնեֆտ» ԲԲԸ գլխավոր խողովակաշարային համակարգի մաս է կազմում։

Ուկրաինական Exilenova+ տելեգրամ ալիքը հաղորդում է, որ տեղի բնակիչները հայտնել են հարձակումից հետո էլեկտրաէներգիայի անջատումների մասին։

Բրյանսկի մարզի նահանգապետ Ալեքսանդր Բոգոմազը հայտարարել է, որ ուկրաինացի զինվորականները հարձակվել են Կլիմովսկի շրջանի Նովի Ռոպսկ գյուղում գտնվող մի մեքենայի վրա, որի հետևանքով վիրավորվել է մեկ կին։

Կրիմսկի նավթաբազայում հրդեհ է բռնկվել անօդաչու թռչող սարքի բեկորների ընկնելու հետևանքով։ Կրասնոդարի երկրամասի օպերատիվ շտաբի նոր հայտարարության համաձայն՝ այն մարվել է առավոտյան։

Նշվում է, որ  անօդաչու թռչող սարքի բեկորների  ընկնելու հետևանքով վիրավորվել է երեք մարդ։

Նրանցից երկուսը հոսպիտալացվել են, իսկ մեկը տեղում ստացել է անհրաժեշտ բժշկական օգնություն։