«Մի տնից 3 ցուցակ եք բերել, 57 հոգի մարդ ա, էսի իմ ու քո մեջ»․ ընտրակաշառքի գործով 62 անձ է ձերբակալվել․ ՏԵՍԱՆՅՈՒԹ

Հակակոռուպցիոն կոմիտեն այսօր հրապարակեց հերթական հաղորդագրությունը ընտրակաշառքի ենթադրյալ դեպքի մասին։ Ըստ կառույցի՝ լայնածավալ միջոցառումների արդյունքում փաստական տվյալներ են ստացվել առ այն, որ մի խումբ անձինք նպատակադրվել են ընտրակաշառք բաժանել Արմավիրի մարզի Վաղարշապատ համայնքում տեղի ունեցած ավագանու ընտրություններին իրենց օգտին քվեարկելու համար:

Հանցավոր մտադրությունն իրականացնելու նպատակով խմբի անդամները հավաքագրել են հիմնականում Հայաստանի Հանրապետական կուսակցության անդամների, ովքեր հանրության շրջանում ունեցել են լայն կապեր և բազմաթիվ ծանոթներ: Արդյունքում հինգ տասնյակից ավել անձանց խոստացել են 50.000-ական դրամի չափով ընտրակաշառք, պայմանով, որ ընտրություններին քվեարկեն «Հայրենիք» կուսակցության թեկնածուի օգտին:

ՀԿԿ-ն նաև գաղտնալսումների հատվածներ է հրապարակել, որում 2 կին են զրուցում․

«Ս․ – 56 հոգի, 57 հոգի մարդ ա, էսի իմ ու քո մեջ էի, Մարին ջան, հլը մինչև տեսնանք՝ առավոտը Մոսոն ինչ ա անում։

Մ․ – Շատ էր պակաս։

Ս․ – Եթե հինգով հաշվեն, պիտի լիներ 2 միլիոն 850 հազար, 1,5-ը ինչ… , որին տայի, որին։ Հետո, Մարին ջան, չէին հավատա, կասեին՝ երևի մենք 3-ով ենք։

Մ․ – Դե բա իհարկե չէին հավատա։

Ս․ – Վրից վերցրել ենք։

Ս․ – Կասեին՝ երևի 15-15-15-ները կամ 20-ները վերցրել են, 30-ները տալիս են, հետո մենք կընկնեինք … մեջ։

Ս․ – Դրա համար ամեն մարդ իրա երամի համար պիտի աշխատի»։

Մանրամասները՝ տեսանյութում։