Հեշտությամբ ընդունել եմ վարչության որոշումը, կոռեկտ չի բարձրաձայնել. ՔՊ-ական պատգամավոր․ ՏԵՍԱՆՅՈՒԹ

ԱԺ իշխող խմբակցության պատգամավոր Դավիթ Դանիելյանը չի մանրամասնում, թե ինչու է ՔՊ վարչությունը չեղարկել իր թեկնածությունն առաջիկա ընտրություններում։

Պատգամավորը խորհրդարանում լրագրողների հետ զրույցում ասաց, որ վարչությունն իրենից որևէ ապացույց կամ պարզաբանում չի պահանջել։

«Ինձանից ոչ ոք ոչ մի փաստ չի պահանջել։ Ես ոչինչ ո՛չ ապացուցել եմ, ո՛չ պարզաբանել։ Ես ընդունել եմ այդ որոշումը և արժանապատիվ դուրս եմ եկել այդ սենյակից»,- ասաց ՔՊ-ական պատգամավորը։

Դավիթ Դանիելյանի պնդմամբ՝ ինքը որևէ անձնական վիրավորվածություն և նեղվածություն չունի։

«Երբ ինձ վիրավորում են, ես պատասխան եմ տալիս․ ես վիրավորված չեմ»,- նշեց պատգամավորը։

Նա, միաժամանակ, վստահեցրեց, որ չի պատրաստվում լքել կուսակցությունը և շարունակելու է իր գործունեությունը մինչև պատգամավորական լիազորությունների ավարտը։

Անդրադառնալով տարածված տեղեկություններին, թե իր ստացած ձայները կարող էին պայմանավորված լինել Արայիկ Հարությունյանի աջակցությամբ, Դանիելյանը հերքեց այդ պնդումները՝ ընդգծելով, որ որևէ նման պայմանավորվածություն կամ աջակցություն չի եղել։

«Ես ձեզ տղամարդկային արժանապատվությամբ ասում եմ, որ Արայիկ Հարությունյանը որևէ կապ չունի իմ տարած ձայների հետ և, ընդհանրապես, ես իր հետ անգամ այդպիսի խոսակցություն չեմ ունեցել։ Երկրորդը՝ որևէ առաջարկ չունեմ գործադիրում աշխատելու։ Նախևառաջ, ես գործող պատգամավոր եմ և կոռեկտ էլ չի հիմա ինձ առաջարկ անել գործադիրում, քանի որ ես դեռ երկու ամսից ավելի ունեմ օրենսդիր գործառույթներ»,- ընդգծեց ՔՊ-ականը։

Դանիելյանի խոսքով՝ իր վերաբերյալ որոշումը կայացվել է ոչ միաձայն։ Նա, սակայն, հրաժարվեց մանրամասնել, թե ովքեր են կողմ կամ դեմ քվեարկել։

ՔՊ-ական պատգամավորը ուղիղ չպատասխանեց հարցին՝ արդյոք քննարկման նախաձեռնողը եղել է ՔՊ վարչության նախագահ Նիկոլ Փաշինյանը։

«Ինձ զանգահարել են կուսակցությունից և հրավիրել»,- ասաց նա՝ առանց հստակեցնելու, թե ով է զանգահարել։

Միաժամանակ, պատգամավորը հաստատեց, որ քննարկմանը ներկա են եղել վարչության անդամները և վերահսկող մարմնի ներկայացուցիչները։

Հիշեցնենք, որ Դանիելյանը մարտի 5-ին էր ֆեյսբուքում գրել, որ ՔՊ վարչության որոշմամբ իր թեկնածությունը չեղարկվել է, և, հետևաբար, առաջիկա ընտրություններին որպես պատգամավորի թեկնածու չի մասնակցելու։

Մանրամասները՝ տեսանյութում։

Արփի Հակոբյան