Հայաստան ժամանած Ֆրանսիսկո Ֆիլիոն հյուրընկալվել է ՀԱՕԿ նախագահ Գագիկ Ծառուկյանին

Հայաստանի ազգային օլիմպիական կոմիտեի (ՀԱՕԿ) նախագահ Գագիկ Ծառուկյանը հյուրընկալել է Կիոկուշին կարատեի աշխարհի բացարձակ չեմպիոն, քիքբոքսինգի բրազիլացի լեգենդար մարտիկ Ֆրանսիսկո Ֆիլիոյին, ով Երևան է ժամանել Հայաստանի Կիոկուշին կարատեի ֆեդերացիայի հիմնադիր-նախագահ Անդրանիկ Հակոբյանի հրավերով։

«Շատ շնորհակալ եմ նման ընդունելության համար, ես տեղյակ եմ, թե դուք ինչ մեծ ներդրում ունեք սպորտի զարգացման գործում ու ինչպիսի նվաճումներ են գրանցվել ձեր շնորհիվ։ Գիտեմ, որ կյանքում ուժեղ լինելը կարևոր է, բայց ավելի կարևոր են կողքիդ մարդիկ, որոնք աջակցում են քեզ»,- ասել է Ֆրանսիսկո Ֆիլիոն, ով Հարավային Ամերիկայի KWU senshi նախագահն է։

Գագիկ Ծառուկյանն ու Ֆրանսիսկո Ֆիլիոն քննարկել են գործակցության տարբեր ձևաչափեր՝ սկսած մարզիկների փոխայցերից մինչև միջազգային մրցաշարերի համատեղ կազմակերպում։

Ապրիլին Երևանում կայանալու է Կիոկուշին կարատեի աշխարհի գավաթը, որի նախապատրաստական աշխատանքներն ընթացքի մեջ են։ Գագիկ Ծառուկյանը կաջակցի, որ մրցաշարն անցկացվի հավուր պատշաճի։

Ֆրանսիսկո Ֆիլիոն այս օրերին սեմինար ու վարպետաց դասեր է անցկացնում Երևանի «Օլիմպավան» սպորտային համալիրում։

55-ամյա բրազիլացին Կիոկուշին կարատեով սկսել է զբաղվել 10 տարեկանից, իսկ 6,5 տարի անց ստացել է սև գոտի։ Անցկացրել է 100-ից ավելի մենամարտ Բրազիլիայում և Ճապոնիայում, նվաճել է բազմաթիվ չեմպիոնական տիտղոսներ։ 1997 թվականին Ֆրանսիսկո Ֆիլիոն նորամուտն է նշել նաև K-1-ում և դարձել քիքբոքսինգի ամենահայտնի մարզիկներից մեկն աշխարհում։ Նա Ճապոնիայում երկու անգամ նվաճել է K-1-ի Համաշխարհային Գրան պրիի հաղթողի կոչումը։