27.06.2026 | 21:49
Վուչիչը հայտարարել է նախագահի պաշտոնում իր «վերջին օրերի» մասին
iPhone-ն ու iPad-ը հասանելիություն են ստացել ՆԱՏՕ-ի գաղտնի տվյալներին
Հաղորդաշարեր
27.02.2026 | 21:42
Apple-ը հայտարարել է, որ իր iPhone և iPad սարքերն առաջին սպառողական սարքերն են, որոնք համապատասխանում են ՆԱՏՕ-ի տեղեկատվական անվտանգության պահանջներին: Սա թույլ է տալիս դրանք օգտագործել «NATO Restricted» մակարդակի գաղտնի տեղեկատվության հետ՝ առանց հատուկ ծրագրակազմ կամ հատուկ կարգավորումներ տեղադրելու: Apple-ի մամուլի հաղորդագրության համաձայն՝ ոչ մի այլ սպառողական բջջային սարք չի հասել կառավարության այս մակարդակի սերտիֆիկացիային, գրում է DW-ի ռուսական ծառայությունը։
Նախկինում, Տեղեկատվական անվտանգության դաշնային գրասենյակի (BSI) փորձագետների կողմից մանրակրկիտ փորձարկումներից հետո, iPhone-ներին ու iPad-ներին թույլատրվել էր մշակել Գերմանիայի կառավարության գաղտնի տվյալները՝ օգտագործելով iOS-ի և iPadOS-ի բնօրինակ անվտանգության գործառույթները: Այժմ iOS 26 և iPadOS 26 օպերացիոն համակարգերով աշխատող iPhone-ներն ու iPad-ները հավաստագրված են նման օգտագործման համար ՆԱՏՕ-ի բոլոր երկրներում։
«Անվտանգ թվային փոխակերպումը հնարավոր է միայն այն դեպքում, եթե տեղեկատվական անվտանգությունը հաշվի առնվի բջջային արտադրանքի մշակման հենց սկզբից», – ասել է BSI-ի գործադիր տնօրեն Կլաուդիա Պլատները: «Գերմանիայում գաղտնի տեղեկատվության միջավայրերում օգտագործելու համար նախատեսված iOS և iPadOS սարքերի BSI-ի կողմից անցկացված հարթակի և սարքերի անվտանգության խիստ աուդիտի հիման վրա մենք ուրախ ենք հաստատել ՆԱՏՕ-ի պահանջներին համապատասխանությունը», – հավելել է նա:
Հավաստագրման շրջանակներում BSI-ն անցկացրել է համապարփակ տեխնիկական գնահատում, լայնածավալ փորձարկումներ և անվտանգության խորը վերլուծություն՝ հաստատելով, որ Apple-ի ներկառուցված անվտանգության հնարավորությունները համապատասխանում են ՆԱՏՕ-ի գործառնական պահանջներին: iOS 26-ը և iPadOS 26-ը ավելացվել են ՆԱՏՕ-ի տեղեկատվական անվտանգության արտադրանքի կատալոգին։
«Այս նվաճումը ցույց է տալիս Apple-ի կողմից անվտանգության նկատմամբ ավանդական մոտեցման վերափոխումը։ iPhone-ից առաջ անվտանգ սարքերը հասանելի էին միայն խոշոր կառավարական և կորպորատիվ կազմակերպություններին, մասնագիտացված լուծումների մեջ կատարված մեծ ներդրումներից հետո», – ասել է Apple-ի անվտանգության համակարգերի մշակման գծով փոխնախագահ Իվան Կրստիչը։
«Apple-ը ստեղծել է աշխարհի ամենաապահով սարքերը իր բոլոր օգտատերերի համար, և այս նույն անվտանգության հնարավորությունները այժմ եզակիորեն սերտիֆիկացված են ՆԱՏՕ-ի պահանջներին համապատասխան՝ ի տարբերություն ոլորտի որևէ այլ սարքի», – ընդգծել է նա։
Թարգմանությունը՝ Էմմա Չոբանյանի
