Լոնդոնում Էփշտեյնի գործի շրջանակում ձերբակալվել է ԱՄՆ-ում Մեծ Բրիտանիայի նախկին դեսպանը

Բրիտանական ոստիկանությունը Լոնդոնում ձերբակալել է ԱՄՆ-ում Մեծ Բրիտանիայի նախկին դեսպան Փիթեր Մանդելսոնին ՝ Ջեֆրի Էփշտեյնի գործի հետ կապված հետաքննության շրջանակներում: DW-ի ռուսական ծառայության փոխանցմամբ՝ 72-ամյա Մանդելսոնին կասկածում են պաշտոնական դիրքի չարաշահման մեջ:

Հրապարակված տեսանյութերում երևում է, թե ինչպես են նրան բերման ենթարկելուց հետո ուղեկցում դեպի մեքենան:

Քննչական գործողությունները սկսվել են փետրվարի սկզբին այն բանից հետո, երբ վարչապետ Քիր Սթարմերի կառավարությունը ոստիկանությանը փոխանցել է Մանդելսոնի և սեռական հանցագործությունների համար դատապարտված ֆինանսիստ Էփշտեյնի միջև նամակագրության նյութերը: Ոչ այն ժամանակ, ոչ հիմա Մանդելսոնից մեկնաբանություններ չկան։ Ս

Սթարմերն էր Մանդելսոնին նշանակել դիվանագիտական պաշտոնում:

Մանդելսոնը հետ է կանչվել Վաշինգտոնում իր պաշտոնից սեպտեմբերին, երբ հայտնի դարձան էփշտեյնի հետ նրա սերտ հարաբերությունների մանրամասները: Առևտրի հարցերով նախկին եվրահանձնակատարին կասկածում են ամերիկյան մուլտիմիլիոնատիրոջը գաղտնի տեղեկատվություն փոխանցելու մեջ:

Ավելի վաղ ձերբակալվել էր արքայազն Էնդրյուն, որին հարցաքննությունից հետո ազատ էին արձակել: Էնդրյու Մաունթբաթեն-Վինձորը կասկածվում է Էփշտեյնին 2001-2011 թվականներին Մեծ Բրիտանիայի հատուկ առևտրային ներկայացուցչի պաշտոնում աշխատելու ընթացքում փակ տեղեկատվություն փոխանցելու մեջ:

Սկանդալը հետևանքներ է ունենում նաև Եվրոպայի այլ երկրներում։ Նորվեգիայում պաշտոնից հեռացել է դիվանագետ Մոնա Յուուլը, թագաժառանգ Մետե-Մարիտը հրապարակավ ներողություն է խնդրել Էփշտեյնի հետ նախկին շփումների համար, իսկ Ֆրանսիայում մշակույթի նախկին նախարար Ժակ Լանգը լքել է արաբական աշխարհի ինստիտուտի նախագահի պաշտոնը:

Հիշեցնենք՝ ԱՄՆ արդարադատության նախարարությունը Կոնգրես էր ուղարկել «քաղաքականապես ազդեցիկ անձանց» ցուցակը, որոնք հիշատակվում են միլիոնավոր ֆայլերում և հրապարակվել են դատապարտված սեռական հանցագործ Ջեֆրի Էփշտեյնի գործով հետաքննության շրջանակում։