19.02.2026 | 16:59
Լոռիում, Տավուշում և Սյունիքում ջերմաստիճանը կնվազի 7-10 աստիճանով
Ձերբակալվել է Մեծ Բրիտանիայի թագավորի եղբայր Էնդրյուն. BBC
Քաղաքականություն
19.02.2026 | 15:38
Մեծ Բրիտանիայի Չարլզ III թագավորի եղբայրը՝ Էնդրյու Մաունթբաթեն-Վինձորը, որին զրկել էին բոլոր տիտղոսներից ամերիկացի ֆինանսիստ Ջեֆրի Էփշտեյնի հետ կապերի պատճառով, ձերբակալվել է։ Ոստիկանությունը նրան ձերբակալել է պաշտոններ զբաղեցնելիս լիազորությունները չարաշահելու կասկածանքով, հաղորդում է BBC-ն։
Հինգշաբթի առավոտյան հրապարակված լուսանկարներում երևում են մեքենաներ, որոնք ժամանել են Նորֆոլքի թագավորական Սանդրինգհեմի կալվածք՝ Հյուսիսային ծովի ափին, որտեղ այժմ բնակվում է Մաունթբեթեն-Վինձորը։ Բրիտանական ոստիկանությունը հայտարարություն է տարածել ձերբակալության մասին, սակայն չի նշել կասկածյալի անունը։
«Մեր հետաքննության շրջանակում մենք այսօր ձերբակալել ենք Նորֆոլքից շուրջ 60 տարեկան մի տղամարդու՝ պաշտոնեական լիազորությունները չարաշահելու կասկածանքով, խուզարկություններ ենք անցկացնում Բերքշիրի և Նորֆոլքի հասցեներում»,- հայտնել է ոստիկանությունը։
Նշվում է, որ տղամարդն այժմ կալանքի տակ է։
Այս շաբաթ բրիտանական ոստիկանությունը հայտարարել էր, որ հետաքննում է նախկին արքայազնի կողմից Էփշտեյնին գաղտնի նյութեր տրամադրելու մասին բողոքը։ ԱՄՆ-ում հրապարակված Էփշտեյնի գործի վերաբերյալ փաստաթղթերի մեծ հավաքածուն ցույց է տվել, որ Էնդրյուն Էփշտեյնին տրամադրել է Սինգապուր, Հոնկոնգ և Վիետնամ կատարած իր ուղևորությունների մասին զեկույցներ, ինչպես նաև ներդրումային հնարավորությունների վերաբերյալ գաղտնի մանրամասներ։ Դրանից հետո, հակամիապետական Republic կազմակերպությունը դիմել էր Թեմզայի հովտի ոստիկանությանը՝ հետաքննել պաշտոնեական լիազորությունների չարաշահման և պետական գաղտնիքների բացահայտման մեղադրանքները։
Էնդրյուն բազմիցս հերքել է իր դեմ ուղղված բոլոր մեղադրանքները՝ պնդելով, որ անօրինական բան չի արել։
Հոկտեմբերին թագավորն իր եղբորը զրկել էր արքայազնի և մյուս բոլոր տիտղոսներից, իսկ դրանից կարճ ժամանակ առաջ Էնդրյուն կամավոր հրաժարվել էր Յորքի դքսի տիտղոսից։
Բրիտանական հանրությունը պահանջում է, որ Էնդրյուն ցուցմունք տա ԱՄՆ-ում դատապարտված մանկապիղծ Էփշտեյնի հետ իր հարաբերությունների մասին։
Թարգմանությունը՝ Էմմա Չոբանյանի
