14.07.2026 | 16:38
Քաղցրաշեն գյուղում 13-ամյա աղջիկ է մահացել․ վարչական շրջանի ղեկավարը՝ դեպքի մասին
25% մաքսատուրքի պատճառով ՀՀ-ն չի կարող հրաժարվել Իրանի հետ ապրանքաշրջանառությունից․ տնտեսագետ
Տնտեսություն
13.01.2026 | 14:41
ԱՄՆ-ի կողմից 25% մաքսատուրքի պատճառով մենք չենք կարող հրաժարվել Իրանի հետ ապրանքաշրջանառությունից։ Factor.am-ի հետ զրույցում այս մասին ասաց տնտեսագետ Սուրեն Պարսյանը։ Նրա խոսքով՝ ԱՄՆ-ից մենք հիմնականում ներկրում ենք ավտոմեքենաներ, տարբեր սարքավորումներ, իսկ 25% մաքսատուրքը վերաբերելու է Հայաստանից ԱՄՆ արտահանմանը, որը մեծ ծավալների չի հասնում․ 50-ից 60 մլն դոլարի չափով արտահանվող ապրանքների մեծ մասը ադամանդ է:
«Այդ ադամանդների վրա 25% մաքսատուրք դնելու դեպքում էլ Հայաստանը մեծ վնասներ չի ունենա, այն պարագայում, երբ որ Իրանի դեպքում մենք ոչ միայն ավելի մեծ առևտրաշրջանառություն ունենք, այլև տարանցման համար կարևոր այլընտրանքային ուղղություն է: Կարծում եմ՝ ադամանդի արտահանման այլ շուկա կարող ենք գտնել, այնպես չի, որ մեծ կորուստ կունենանք»,- ասաց տնտեսագետը։
Հիշեցնենք, որ ԱՄՆ նախագահ Դոնալդ Թրամփը truthsocial-ում գրառում է արել, որով Իրանի հետ առևտուր անող երկրներին սպառնացել է 25% մաքսատուրքով։
Նշենք, որ դեռևս 2025 թվականի ապրիլին Թրամփը Հայաստանի Հանրապետության համար 10% մաքսատուրք էր սահմանել։ Պարսյանն ընդգծում է՝ արդեն իսկ սահմանված 10% մաքսատուրքի վրա կավելանա լրացուցիչ 15%։ Այնուամենայնիվ, տնտեսագետի կարծիքով, ՀՀ-ն չպետք է թողնի, որ 25% մաքսատուրքը մնա և պետք է բանակցի, թեկուզ որոշ ժամանակ անց այդ տոկոսն իջեցնելու վրա։
«Տնտեսական դաշտում ունենք գազ-էլեկտրաէներգիայի դիմաց ծրագիրը, ունենք և այլ նախագծեր, որոնք նախկինում համաձայնեցված են եղել ամերիկյան կողմի հետ: Այսինքն, մենք երբ որ Իրանի հետ այս կամ այն խոշոր ծրագիրը փորձել ենք իրականացնել, միշտ համաձայնեցրել ենք ԱՄՆ-ի հետ: Նույնիսկ դրանց մասին տարբեր արձանագրություններ կան: Եվ չի եղել դեպք, որ ԱՄՆ-ն, այսպես ասած, սանկցիա կիրառի հայկական ընկերությունների նկատմամբ՝ Իրանի հետ առևտուր անելու համար»,- նշեց Սուրեն Պարսյանը։
Հայաստանը Իրանի հետ տարեկան շուրջ 100 մլն դոլարի չափով արտահանում և ավելի քան 600 մլն դոլարի չափով ներկրում է իրականացնում: ԱՄՆ-ի հետ ՀՀ-ի ապրանքաշրջանառությունը մոտ 300 մլն դոլար է, ներմուծումը 5 անգամ գերազանցում է արտահանումը։
Անի Թամրազյան
