Արցախում 36 միլիոն դոլարի մարզադաշտի կառուցման համար Բաքուն պայմանագիր է կնքել Ալիևի  ընտանիքի հետ կապված ընկերության հետ

Մինչ Ադրբեջանի նախագահ Իլհամ Ալիևը հրապարակավ քննադատել է պետական ​​պաշտոնյաների շրջանում կոռուպցիան, երկրի Երիտասարդության և սպորտի նախարարությունը 36 միլիոն դոլարի պայմանագիր է կնքել նրա ընտանիքի անդամներին պատկանող ընկերության հետ։ OCCRP-ն գրում է, որ պետական ​​գնումների ռեգիստրի համաձայն՝ Ադրբեջանի կառավարությունը Արցախի Աղդամ քաղաքում ֆուտբոլային մարզադաշտի վերակառուցման 35,6 միլիոն դոլարի պետական ​​պայմանագիր է կնքել նախագահ Իլհամ Ալիևի ընտանիքի անդամներին պատկանող կոնգլոմերատի հետ կապված շինարարական ընկերության հետ։

Նշվում է, որ պայմանագիրն ընդգծում է ավելի լայն մտահոգություններ Ադրբեջանի հետպատերազմյան վերականգնման ջանքերի թափանցիկության և շահերի բախման վերաբերյալ, քանի որ կառավարությունը պետական ​​միջոցներ է հատկացնում 2020 թվականի Լեռնային Ղարաբաղի պատերազմից հետո վերադարձված տարածքների վերականգնմանը, միաժամանակ, բազմիցս խոշոր նախագծեր շնորհելով քաղաքական կապեր ունեցող ընկերություններին։

Պայմանագիրը Երիտասարդության և սպորտի նախարարության կողմից տրվել է PMD Projects LLC ընկերությանը։ Այն վերաբերում է «Իմարաթ» մարզադաշտի վերակառուցմանը, որը «Ղարաբաղ» ֆուտբոլային ակումբի նախկին տնային մարզադաշտն է, որն ադրբեջանական առաջատար ակումբ է և այժմ մասնակցում է 2025-26 թվականների ՈՒԵՖԱ-ի Չեմպիոնների լիգային:

PMD Projects-ը PMD Group LLC-ի դուստր ձեռնարկությունն է, որը, ըստ հրապարակային ֆինանսական հաշվետվությունների, գործում է PASHA Holding-ի հովանու ներքո։ Այն երկրի խոշորագույն բիզնես կոնգլոմերատներից մեկն է, որի վերջնական շահառուների թվում են նախագահի երկու դուստրերը՝ Լեյլա և Արզու Ալիևաները, նրա աները՝ Արիֆ Փաշաևը, և ​​կնոջ զարմիկը՝ Միր Ջամալ Փաշաևը։

Նախագիծը հրապարակայնորեն մեկնարկել է 2024 թվականի սեպտեմբերին կայացած բարձր մակարդակի արարողության ժամանակ, երբ նախագահ Ալիևը մասնակցել է մարզադաշտի հիմնաքարի տեղադրման արարողությանը՝ իր որդի Հեյդար Ալիևի և երիտասարդության և սպորտի նախարար Ֆարիդ Գայիբովի հետ։ Նախագահական հայտարարության մեջ ասվում էր, որ 19 հեկտար տարածք զբաղեցնող համալիրը կներառի 11,700 տեղանոց մարզադաշտ, մարզական կենտրոններ, VIP համարներ և առևտրային տարածք։

Երիտասարդության և սպորտի նախարարությունը չի արձագանքել մեկնաբանության հարցումներին։

LinkedIn-ում ընկերության գրառման համաձայն՝ Իմարաթ մարզադաշտի համալիրի նախագծային աշխատանքները վերահսկում է Design Bureau LLC-ն:Ադրբեջանական հետաքննչական  Abzas Media լրատվական կայքը նախկինում հայտնել էր, որ Design Bureau օգտագործել է նույն հասցեն և աշխատակազմը, ինչ PMD Group-ը և PASHA Holding-ը, և ինքն էլ ստացել է վերակառուցման համար պետական ​​պայմանագրերը։

Թարգմանությունը՝ Էմմա Չոբանյանի