Պուտինը չի ուզում, որ որևէ մեկը տեսնի` ինքը ստիպված է եղել զիջել. Ալեքսանդր Բաունով

Meduza-ն զրւցել է քաղաքագետ, Բեռլինի Կարնեգի կենտրոնի`Ռուսաստանի և Եվրասիայի հարցերով ավագ գիտաշխատող Ալեքսանդր Բաունովի հետ ու հարցրել՝ արդյոք Սպիտակ տան նոր առաջարկը կարո՞ղ է  մոտեցնել Ուկրաինային և Ռուսաստանին խաղաղության համաձայնագրի ստորագրմանը:

«Սա բոլորովին էլ առաջընթաց չէ, այլ միակ բովանդակալից փաստաթուղթն է, որը մենք տեսել ենք Թրամփի միջնորդական ջանքերի ընթացքում:  Թրամփը պնդում է, որ մոդերատոր է, բայց մենք չենք տեսել այդ մոդերացիայի բովանդակությունը․ չգիտենք նրա և Պուտինի, Լավրովի և Ռուբիոյի զրույցների բովանդակությունը, Սաուդյան Արաբիայում, Ստամբուլում կայացած հանդիպումների արդյունքները։ Մեր իմացածը Twitter-յան գրառումներն են և պաշտոնական հաղորդագրությունները»,- ասել է Բաունովը։

Ապա նշել է, որ տեղյակ են, որ Լավրովը ինչ-որ փաստաթղթեր է ուղարկել ԱՄՆ, և ըստ շրջանառվող լուրերի, նրա պահանջները չափազանց կոշտ են եղել։

«Արտահոսած փաստաթուղթը առաջարկվել է որպես պայմանական համաձայնագիր ԱՄՆ-ի և Ռուսաստանի միջև՝ Ուկրաինայի, և հատկապես Եվրոպայի մեջքի ետևում։ Այս փաստաթուղթը բավականին կողմնակալ է ու Ռուսաստանի օգտին. այն օգնում է Պուտինին ստեղծել հաղթանակի պատկեր»,- կարծիք է հայտնել քաղաքագետը՝ հավելելով․

«Իսկ դատելով Զելենսկու Twitter-յան գրառումից, նա խոսել է Վենսի հետ (ԱՄՆ փոխնախագահ-խմբ․), և նրանք համաձայնել են վերջնականապես մշակել այս փաստաթուղթը եվրոպացիների հետ միասին։ Այդ դեպքում սեղանին կհայտնվի նոր փաստաթուղթ՝ այս ոչ պաշտոնական փաստաթղթի նոր տարբերակը՝ Ուկրաինայի համար փոքր-ինչ ավելի լավ պայմաններով և, համապատասխանաբար, Ռուսաստանի համար փոքր-ինչ ավելի վատ պայմաններով»։

Եվ այդ փոփոխությունը տեղի կունենա հրապարակայնորեն։ Բաունովը նշել է՝ եթե փաստաթուղթը սկզբում 70% ռուսամետ էր, ապա վերանայումից հետո այն կդառնա, օրինակ, 60% ռուսամետ․ «Եվ այդ ժամանակ հարց կառաջանա ՝ ինչպե՞ս դրան կարձագանքի Պուտինը, քանի որ նրա համար պայմանները կվատթարանան, և դա տեղի կունենա հրապարակայնորեն։ Իսկ Պուտինը չի ուզում, որ որևէ մեկը տեսնի, որ ինքը ստիպված է եղել զիջել։ Այդ դեպքում Պուտինը կբախվի հոգեբանական և քաղաքական դժվարությունների հետ, քանի որ նա հրապարակայնորեն ստիպված կլինի համաձայնվել ներկայիս ոչ պաշտոնական փաստաթղթում պարունակվողից ավելի  վատ պայմանների»։

Զրույցն ամփոփելով Բաունովը նշել է, որ դրանից հետո Ռուսաստանը կարող է հրաժարվել բանակցություններից և հետ քաշվել։

Հիշեցնենք, որ ԱՄՆ-ը 28 կետից բաղկացած խաղաղության ծրագիր էր առաջարկել։

Որին ՌԴ նախագահ Վլադիմիր Պուտինը պատասխանել էր՝ ասելով, որ այն կարող է Ուկրաինայի հարցով կարգավորման հիմք դառնալ։

Իսկ Ուկրաինայի նախագահ Վլադիմիր Զելենսկին հայտարարել էր, որ իր երկիրը կանգնած է «շատ դժվար ընտրության առաջ՝ կամ կորցնել արժանապատվությունը, կամ ռիսկի դիմել կորցնելու կարևոր գործընկերոջը», նկատի ունենալով Միացյալ Նահանգները:

Ավելի ուշ Միացյալ Նահանգները Ուկրաինային սպառնացել էր դադարեցնել հետախուզական տվյալների և զենքի տրամադրումը, եթե Ուկրաինան մինչև նոյեմբերի 27-ը չստորագրի խաղաղության ծրագիրը։

Թարգմանությունը՝ Անահիտ Խաչատրյանի