30.10.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Ուկրաինան շատ դժվար ընտրության առաջ է կանգնած. Զելենսկին Թրամփի խաղաղության ծրագրի hետ կապված ուղերձով դիմել է ժողովրդին
Քաղաքականություն
21.11.2025 | 21:27
Ուկրաինայի նախագահ Վլադիմիր Զելենսկին ԱՄՆ-ի խաղաղության ծրագրի հետ կապված դիմել է ուկրաինացիներին՝ նշելով, որ երկիրն այժմ շատ դժվար ընտրության առաջ է կանգնած։
«Մենք հիմա գտնվում ենք մեր պատմության ամենադժվար պահերից մեկում։ Ուկրաինայի վրա ճնշումն ամենածանրերից է։ Ուկրաինան այժմ կարող է շատ դժվար ընտրության առաջ կանգնել՝ կա՛մ արժանապատվության կորուստ, կա՛մ կարևոր գործընկերոջը կորցնելու ռիսկ»,- ասել Ուկրաինայի նախագահը։
Զելենսկին խոսել է ընտրության մասին՝ «կա՛մ դժվար 28 կետերը, կա՛մ չափազանց դժվար ձմեռ և հետագա ռիսկերը»։ Նա ընդգծել է, որ այս հարցի պատասխանը տվել է 2019 թվականի մայիսի 20-ին՝ Ուկրաինային հավատարմության երդման ժամանակ, երբ խոստացել էր պաշտպանել Ուկրաինայի ինքնիշխանությունն ու անկախությունը, ինչպես նաև պաշտպանել նրա քաղաքացիների իրավունքներն ու ազատությունները։ Նա հայտարարել է Միացյալ Նահանգների հետ լուծումների որոնման մասին՝ նշելով, որ կառաջարկի այլընտրանքներ։
«Մենք թշնամուն որևէ պատճառ չենք տա՝ ասելու, որ Ուկրաինան չի ուզում խաղաղություն, որ խաթարում է գործընթացը, և որ Ուկրաինան պատրաստ չէ դիվանագիտության: Դա տեղի չի ունենա: Ուկրաինան արագ կաշխատի»,- հայտարարել է Զելենսկին։
Նա հիշեցրել է, որ Ուկրաինան ներկայում «միակ վահանն» է, որը հարմարավետ եվրոպական կյանքը բաժանում է Վլադիմիր Պուտինի ծրագրերից։ Ուկրաինայի նախագահը շեշտել է՝ ամբողջ աշխարհը պետք է հասկանա, որ ուկրաինացիները, առաջին հերթին, մարդիկ են, և որ նրանք գրեթե չորս տարի շարունակ, լայնամասշտաբ պատերազմի ընթացքում, զսպել են աշխարհի ամենամեծ բանակներից մեկին։
«Թշնամին չի տեսել մեր մեջքը։ Նա տեսել է մեր աչքերը՝ լի իրեն պատկանողի համար պայքարելու պատրաստակամությամբ։ Սա է արժանապատվությունը։ Սա է ազատությունը։ Եվ սա իսկապես ամենասարսափելին է Ռուսաստանի համար՝ տեսնել ուկրաինացիներին միավորված»,- հայտարարել է Զելենսկին։
Թարգմանությունը՝ Էմմա Չոբանյանի
