07.04.2026 | 23:00
Ռուսաստանը և Չինաստանը խափանել են ՄԱԿ-ի ԱԽ-ի բանաձևը Հորմուզի նեղուցի վերաբերյալ
Բաքուն՝ ցեղասպանության մեղսակից․ Գազայի պատերազմի ժամանակ Ադրբեջանը մատակարարել է Իսրայել ներմուծված նավթի 40%-ը
Քաղաքականություն
21.11.2025 | 23:14
Oil Change International-ը՝ բրածո վառելիքը վերահսկող կազմակերպությունը, պարզել է, որ Գազայի պատերազմի ժամանակ Իսրայելի կողմից ներմուծված հում նավթի 40%-ն ադրբեջանական ծագում է ունեցել, գրում է OC Media-ն։
Կազմակերպությունը հրապարակել է զեկույց, որն ուղղված է ՄԱԿ-ի կլիմայի փոփոխության ամենամյա COP30 համաժողովին։ Նշվում է, որ 2023 թվականի նոյեմբերից մինչև 2025-ի հոկտեմբերն ընկած ժամանակահատվածում Ադրբեջանը (Թուրքիայի միջոցով) և Ղազախստանը (Ռուսաստանի միջոցով) Իսրայելին մատակարարել են հում նավթի մոտ 70%-ը, ընդ որում՝ ադրբեջանական արտադրանքն առաջատար է՝ կազմելով ավելի քան 7 միլիոն տոննա, կամ ընդհանուրի գրեթե 40%-ը։ Զեկույցի համաձայն՝ դիտարկվող ժամանակահատվածում Բաքու-Թբիլիսի-Ջեյհան (BTC) խողովակաշարով իրականացվել է ադրբեջանական նավթի 61 առաքում, որտեղ որպես ծագման երկիր նշված է Թուրքիան։ Երկրորդ տեղում է Ղազախստանը՝ Ռուսաստանի միջոցով առաքված մոտ 5,3 միլիոն տոննայով։
Զեկույցը մեջբերել է դոկտոր Իրենե Պիետրոպաոլիի իրավական կարծիքը, որտեղ նշվում է, որ այն երկրները, որոնք պատասխանատու են Ադրբեջանին հում կամ վերամշակված նավթամթերք մատակարարելու համար, պետք է «հաշվի առնեն, որ Իսրայելի ռազմական գործողություններին իրենց ցուցաբերած ռազմական կամ այլ օգնությունը կարող է նրանց վտանգի տակ դնել՝ ցեղասպանության մասին կոնվենցիայի համաձայն՝ մեղսակից լինելու համար»։
Նշվում է նաև, որ պատերազմի ընթացքում Իսրայելին վառելիք մատակարարած պետությունները «դա արել են՝ լիովին գիտակցելով նրա վայրագությունները»։
Ադրբեջանը սերտ կապեր ունի Իսրայելի հետ՝ մատակարարելով էներգիա և փոխարենը ստանալով ժամանակակից զենք։ Նույնիսկ այն դեպքում, երբ Իսրայելը բախվում է միջազգային աճող դատապարտման Գազայում պատերազմ վարելու համար, Ադրբեջանը խորացրել է իր կապերը, մասնավորապես, Ադրբեջանի պետական նավթային ընկերության՝ SOCAR-ի միջոցով։
Հունիսին SOCAR-ը գնել է Թամարի՝ Իսրայելի ամենամեծ գազային հանքավայրերից մեկի 10% բաժնեմասը, որը գտնվում է Հայֆայից 90 կիլոմետր հեռավորության վրա։ Այս գործարքի արժեքը գնահատվում է 1,25 միլիարդ դոլար։
Թարգմանությունը՝ Էմմա Չոբանյանի
