Telegram-ը գործնականում դադարել է աշխատել Ռուսաստանում

Ռուսաստանում Telegram-ի աշխատանքի լայնածավալ խափանումների մասին հաղորդագրություններ են ստացվում։ Մեսենջերը գործնականում դադարել է աշխատել նույնիսկ VPN-ի օգտագործման դեպքում բոլոր տարբերակներում՝ բջջային, համակարգչային և վեբ, հաղորդել են ռուսական լրատվամիջոցները, հղում անելով Ռուսաստանի տարբեր շրջաններից, այդ թվում՝ Մոսկվայից և Սանկտ Պետերբուրգից օգտատերերի բողոքներին, գրում է DW-ի ռուսական ծառայությունը։

«Կոմերսանտ» պարբերակաանը, հղում անելով փորձագետներին, նշում է, որ Telegram-ն արդեն արգելափակված է Ռուսաստանում, ինչպես վերջին շաբաթներին լայնորեն հաղորդվել է։

«Վերջին 24 ժամվա ընթացքում Telegram-ը գործնականում անհասանելի է եղել տնային մատակարարներից, եթե խոսքը ռուսական IP հասցեներից միացումների մասին է։ Մոռացեք Telegram-ը բջջային ինտերնետով օգտագործելու մասին։ Եթե որոշակի քաղաքում ակտիվ են միայն սպիտակ ցուցակում գտնվող կայքերը, ապա VPN ծառայությունների մեծ մասը թույլ չի տա ձեզ մուտք գործել Telegram»,- ասել է «Код Дурова»-ի փորձագետ Վլադիսլավ Վոյտենկոն։

MAKATEL հեռահաղորդակցության օպերատորների ասոցիացիայի նախագահ Ալեքսեյ Ամելկինը հաստատել է Telegram-ի հետ կապված խնդիրները:

«Դանդաղեցումները որոշ ժամանակ շարունակվում են, բայց երեկ բողոքներ հայտնվեցին, որ Telegram-ի համակարգչային տարբերակը դադարել է աշխատել: Օպերատորների վիճակագրությունը դեռևս քիչ է, և դրանք ճշգրիտ չեն, քանի որ մարդիկ օգտագործում են VPN-ներ, ուստի դժվար է ասել՝ արդյոք մեսենջերը աշխատում է, թե ոչ: Թեստերը ցույց են տալիս, որ ամենայն հավանականությամբ դա կախված է ցանցից՝ բջջային կամ ստացիոնար, ինչպես նաև տարածաշրջանից և նույնիսկ գտնվելու վայրից: Պետական ​​​​մարմինները տարբեր տարածաշրջաններում կիրառում են տարբեր պայմաններ, հնարավոր է՝ փորձարկման նպատակներով»,- նշել է նա:

Անցած շաբաթավերջին Downdetector և «sboy.rf» կայքերում Telegram-ի տարբեր տարբերակների վերաբերյալ բողոքների թիվը կրկին աճել էր տարբեր տարածաշրջանների օգտատերերի կողմից, որոնց մեծ մասը Մոսկվայից, Սանկտ Պետերբուրգից և Մոսկվայի մարզից էին։

Մինչդեռ, մարտի 16-ին Մոսկվայի Տագանսկի շրջանային դատարանը Telegram-ին 35 միլիոն ռուբլով տուգանել է Ռուսաստանում արգելված բովանդակությունը հեռացնելուց հրաժարվելու համար: Այս բովանդակությունը ներառում է «ծայրահեղականության» կոչեր, անչափահասների մասնակցությամբ պոռնոգրաֆիկ նյութեր և թմրանյութեր պատրաստելու և գնելու վերաբերյալ տեղեկատվություն:

Թարգմանությունը՝ Էմմա Չոբանյանի