Հորմուզի նեղուցում նավագնացության վերականգնումը չպետք է լինի ՆԱՏՕ-ի առաքելություն․ Մեծ Բրիտանիայի վարչապետ

Լոնդոնը գործընկերների հետ աշխատում է՝ վերականգնելու Հորմուզի նեղուցում առևտրային նավարկության ազատությունը, սակայն սա «դժվար խնդիր է»։ Դաունինգ սթրիթում լրագրողներին ասել է Մեծ Բրիտանիայի վարչապետ Քիր Սթարմերը, գրում է BBC-ի ռուսական ծառայությունը;

Հորմուզի նեղուցը պետք է վերաբացվի՝ «շուկաներում կայունությունն ապահովելու համար»,  հավելել է նա։

Սթարմերի խոսքով՝ ԱՄՆ-ի գործողությունը «զգալիորեն թուլացրել է» «Իրանի ռեժիմի» ռազմական կարողությունները։ Սակայն հակամարտության ավարտից հետո անհրաժեշտ կլինի որոշակի «համաձայնագիր», որը կսահմանափակի Իրանի կարողությունը՝ վերականգնելու իր միջուկային ծրագիրը, նաև ապահովելու միջազգային նավագնացության անվտանգությունը։

Ըստ նրա՝ Մեծ Բրիտանիան ունի հստակ նպատակներ, և գերակա խնդիրը «մեր քաղաքացիների պաշտպանությունն է այս տարածաշրջանում»։ Սթարմերը հավելել է, որ Մեծ Բրիտանիան կշարունակի աշխատել իրավիճակի արագ կարգավորման համար։

Պաշտոնյան նաև հայտարարել է, որ իր կարծիքով՝ Հորմուզի նեղուցում ազատ առևտրի նավարկության վերականգնումը ՆԱՏՕ-ի առաքելություն չէ։ Սթարմերը կարծում է, որ դա կպահանջի լայն դաշինքի աշխատանք, որը կներառի Պարսից ծոցի, եվրոպական երկրների և Միացյալ Նահանգների գործընկերներին։

«Մենք աշխատում ենք այլ երկրների հետ՝ Հորմուզի նեղուցի համար համոզիչ ծրագիր մշակելու համար, որը թույլ կտա մեզ վերսկսել նավագնացությունն ու անցումը նեղուցով։ Թույլ տվեք հստակեցնել. սա ՆԱՏՕ-ի առաքելություն չէ և երբեք էլ նախատեսված չի եղել լինել։ Սա պետք է լինի գործընկերների դաշինք, ուստի մենք աշխատում ենք Եվրոպայի, Պարսից ծոցի երկրների և Միացյալ Նահանգների գործընկերների հետ»,- Մեծ Բրիտանիայի վարչապետի խոսքերն է մեջբերում Reuters-ը։

Սթարմերը նաև հավելել է, որ Հորմուզի նեղուցի վերաբացման հարցը ներկայում քննարկման փուլում է, և կողմերը դեռևս որոշումների կայացման փուլում չեն։

ԱՄՆ նախագահ Դոնալդ Թրամփը Financial Times-ին տված հարցազրույցում հայտարարել էր, որ ՆԱՏՕ-ն «համար վատ կլինի», եթե իր դաշնակիցները չկարողանան ապահովել Հորմուզի միջով անվտանգ նավագնացություն։