14.04.2026 | 23:28
Կրեմլը վերանայում է ինտերնետի սահմանափակումների նկատմամբ մոտեցումը՝ վախենալով Պուտինի վարկանիշի անկումից․ Bloomberg
Գաղտնալսե՞լ են Խաչատրյանի թիմին. ընտրակաշառքի գործը «Հաղթանակ» դաշինքում շինծու են համարում. ՏԵՍԱՆՅՈՒԹ
Քաղաքականություն
18.11.2025 | 20:15
Վաղարշապատի ընտրություններին մասնակցած «Հաղթանակ» դաշինքի անդամների տներում խուզարկություններին դաշինքի համայնքապետի թեկնածուն այսպես է արձագանքում․ «Եթե մենք հաղթանակ տանեինք, ինձ թվում է՝ ամբողջ թիմով լինելու էինք կալանավայրերում»: Սևակ Խաչատրյանը բացառում է ընտրակաշառք վերցնելու դեպքերը։
Խուզարկություններից հետո 5 անձի մեղադրանք է առաջադրվել։ Հակակառուպցիոն կոմիտեից հայտնել են, որ քրեական վարույթը նախաձեռնվել է ընտրակաշառք ստանալու, տալու և ընտրակաշառքի միջնորդության դեպքերի առթիվ։
Կոմիտեից Factor TV-ին տեղեկացրին, որ մեղադրյալների նկատմամբ ընտրվել են անազատության հետ չկապված խափանման միջոցներ։ Սևակ Խաչատրյանի խոսքով՝ մեղադրյալի կարգավիճակ ունեցողներից երեքին է ճանաչում, որոնցից երկուսը գործող ավագանու անդամներ են։ Ասում է՝ մյուս երկուսին չի ճանաչում, կարծում է՝ իրենց ձայն տվողներից են։
Այդ երկու անձանց շահերը պաշտպանում է փաստաբան Ալեքսանդր Կոչուբաևը։ Ըստ նրա՝ Սևակ Խաչատրյանի հետ նվազագույն առնչություն ունեցող անձինք եղել են իրավապահ մարմինների օպերատիվ վերահսկողության տակ և գաղտնալսվել։ Փաստաբանը շեշտում է՝ կենցաղային խոսակցությունը վերածվել է քրեական վարույթի։ Հակակոռուպցիոն կոմիտեն մեղադրյալներին կալանավորման միջնորդություն չի ներկայացրել։
Սևակ Խաչատրյանն ասում է՝ վերցնելու են ավագանու իրենց մանդատները։
Վաղարշապատ համայնքի ավագանու ընտրությունների նախնական արդյունքների համաձայն՝ «Քաղաքացիական պայմանագիր» կուսակցությունը ստացել է 15,298 քվե, «Հաղթանակ» կուսակցությունների դաշինքը երկրորդ տեղում է՝ 10,051 քվեով:
Նախնական տվյալներով՝ ավագանու 33 տեղերից ՔՊ-ն կունենա 19 մանդատ, «Հաղթանակ» դաշինքը՝ 12, «Մայր Հայաստան»-ը՝ 2։ Սա նշանակում է, որ ՔՊ-ն միանձնյա կարող է համայնքապետ նշանակել՝ առանց որևէ ուժի հետ կոալիցիա կազմելու։
Մանրամասները՝ տեսանյութում։
Անի Թամրազյան
