Ձերբակալվել է Գեղակերտի դպրոցի ՔՊ-ական դպրոցի տնօրենը. կալանքի միջնորդություն է ներկայացվել

Ձերբակալվել է Խոյ համայնքի Գեղակերտ գյուղի դպրոցի տնօրեն Անուշ Համբարձումյանը։ Տեղեկությունը FactorTV-ի հետ զրույցում հաստատեցին Հակակոռուպցիոն կոմիտեից՝ առանց նշելու անձի անունը։

«Կոմիտեի կողմից իրականացված օպերատիվ-հետախուզական միջոցառումների արդյունքում ստացված տվյալների հիման վրա նախաձեռնվել է քրեական վարույթ բարեգործության արգելքը խախտելու դեպքի առթիվ։ Քրեական վարույթի շրջանակում ձերբակալվել է մեկ անձ, որի նկատմամբ կալանքը որպես խափանման միջոց կիրառելու միջնորդություն է ներկայացվել դատարան»,- տեղեկացրեց կոմիտեի մամուլի քարտուղար Մարինա Օհանջանյանը։

Հիշեցնենք՝ օրեր առաջ Newday.am-ը տեսանյութ էր հրապարակել՝ նշելով, թե ՔՊ-ական Համբարձումյանն ընտրություններին զուգահեռ օգնություն է բաժանում։ Ավելի ուշ Համբարձումյանը ֆեյսբուքյան էջում պարզաբանում էր տարածել, թե «որոշ լրատվականներ, առանց հաշվի առնելու մարդու տարիներով կատարած բազմաթիվ բարեգործական կամավոր աշխատանքները, փորձում են այլ կերպ ներկայացնել, որը որևէ աղերս չունի իրականության հետ».

«Հերթական աշխատանքը, որը ստիպված էի կատարել, քանի որ Կամրջակից ասացին որ դոնոր կազմակերպություններին պետք է հաշվետվություն ներկայացնեն, իմ հրաժարվելու դեպքում 60 սովորող կզրկվեր տաք կոշիկներից և հագուստից։ Առաջնորդվելով մտքի և խղճի բարձր զգացումով, որ սոցիալական ծանր կացության մեջ կտնվող ծնողների համար սա անհրաժեշտություն է՝ համաձայնեցի»,- գրել էր Համբարձումյանը՝ կից ներկայացնելով, թե ինչ իրեր և առարկաներ է տարվա ընթացքում փոխանցել շահառուներին։

Անուշ Համբարձումյանը Վաղարշապատի ընտրություններին հանձնաժողովի նախագահ էր նշանակվել «Քաղաքացիական պայմանագիր» կուսակցության կողմից։

Ռոզա Վարդանյան