Քաղաքականություն
04.11.2025 | 16:45
Տեր Տարոն քահանա Հունանյանը, որն աջակցություն է հայտնել կարգալույծ արված Տեր Արամին, որն ըստ Մայր Աթոռի պետք է կոչվի ավազանի անունով՝ Ստեփան Ասատրյան, այսօր հրաժարվել է հանդիպել կարգապահական հանձնախմբին և քննել անձնական ու ծառայական հարցեր։ Այս մասին քահանան հայտնեց Մայր Աթոռ Սուրբ Էջմիածնի բակում լրագրողների հետ զրույցում։
Նշենք, որ քահանան երեկ էր գրառում արել և հայտնել, որ իրեն հրավիրել են Մայր Աթոռ Սուրբ Էջմիածին՝ հանդիպելու կարգապահական հանձնախմբին։
«Ես ասացի, որ հրաժարվում եմ այս հանձնախմբի հետ իմ անձնական հարցերը քննելու, առավել ևս՝ ծառայական, քանզի ես պատշաճ չեմ համարում՝ տեսնելով, թե ովքեր են հանձնախմբի անդամները։ Խնդրեցի, որ հանձնախումբը նախ քննի իր անդամների կարգապահական հարցերը, հետո անդրադառնա ինձ վերաբերող հարցեին»,- լրագրողների հետ զրույցում ասաց Տեր Տարոն քահանա Հունանյանը։
Նա, սակայն, անուններ չնշեց՝ միայն ընդգծեց, որ նրանք հայտնի են։
«Ինչ հանձնախումբ որ կա, ովքեր ինձ սպասում էին, հանդիպեցի իրենց հետ, նախապես չթաքցրի, որ չեմ քննարկելու եթե ինձ համար անընդունելի մարդիկ լինեն, որոնց վարքը քննելու ենթակա է։ Ես կարծում եմ՝ բոլորդ լավ հասկանում եք, թե ում մասին է խոսքը»,- ասաց քահանան՝ դարձյալ առանց կոնկրետ անուններ հնչեցնելու։
Ըստ քահանայի՝ այդ ամենն ասել և դուրս է եկել։
«Ես կարծում եմ, որ հայ եկեղեցում ամեն մարդ, որ հոգևոր չէ, պիտի հեռանա, ես հիմա չեմ ուզում անուններ տալ, ժողովուրդը կարող է գնահատել»,- ասաց Հաղարծինի քահանան։
Նշենք, որ Մայր Աթոռը նրան հրավիրել էր Հանձնախմբի նիստին՝ պարզաբանումներ ներկայացանելու «ծառայության վայրն ինքնակամ լքելու, հոկտեմբերի 26-ին Հովհաննավանքում կարգազուրկ հռչակված Ստեփան Ասատրյանի կողմից բեմականացված հակականոնական արարողությանը մասնակցելու, նաև նույն օրը լրագրողներին հրապարակային հակաեկեղեցական հայտարարություններ կատարելու» համար։
Տեր Տարոն քահանան ասաց նաև, որ դեռ որոշում չունի՝ կմասնակցի այս կիրակի Թալինում անցկացվելիք պատարագին, որին ներկա է լինելու վարչապետ Փաշինյանը, թե ոչ։
Արփի Հակոբյան
