Վրաստանի Սահմանադրական դատարանը վարույթ է ընդունել երեք ընդդիմադիր կուսակցություններն արգելելու վերաբերյալ իշխող ուժի հայցը

Վրաստանի Սահմանադրական դատարանը վարույթ է ընդունել «Վրացական երազանք» կուսակցության կողմից ներկայացված հայցը, որով իշխող ուժը պահանջում է դադարեցնել երեք հիմնական ընդդիմադիր կուսակցությունների գործունեությունը: Հոկտեմբերի 31-ով թվագրված փաստաթուղթը հրապարակվել է դատարանի կայքում նոյեմբերի 4-ին, գրում է The Insider-ը։

Վրաստանի խորհրդարանի 88 պատգամավորների անունից ներկայացված դատական ​​հայցը պահանջում է հակասահմանադրական ճանաչել «Միացյալ ազգային շարժում», «Հանուն փոփոխությունների կոալիցիա» և «Ուժեղ Վրաստան – Լելո» կուսակցություններն ու արգելել նրանց գործունեությունը։ Երեք կուսակցություններն էլ խորհրդարան են մտել 2024 թվականի հոկտեմբերի ընտրություններում, սակայն հրաժարվել են վերցնել մանդատները՝ պնդելով, որ ընտրությունները կեղծվել են «Վրացական երազանքի» օգտին, որը մեծամասնություն է ստացել։

Հայցվորներն ընդդիմադիր կուսակցություններին մեղադրում են երկրի հիմնարար օրենքը խախտելու մեջ:

«Վրաստանի Սահմանադրությունն անընդունելի է համարում այնպիսի քաղաքական կուսակցության ստեղծումը և գործունեությունը, որի նպատակը Վրաստանի սահմանադրական կարգի բռնի տապալումը կամ փոփոխությունն է, երկրի անկախության խախտումը կամ տարածքային ամբողջականության խախտումը»,- նշվում է հայցում:

Հայցվորների պնդմամբ՝ ներկայիս ընդդիմադիր ուժերը պատասխանատու են մարդու իրավունքների խախտումների համար 2004-2012 թվականներին, երբ իշխանության գլուխ էր Միխեիլ Սաակաշվիլիի կուսակցությունը, ինչպես նաև դրանից հետո խորհրդարանի աշխատանքը խաթարելու փորձերի համար։

«Երկրի անկախության նկատմամբ ոտնձգություն և տարածքային ամբողջականության խախտում» մեղադրանքները վերաբերում են 2008 թվականի պատերազմի հետ կապված իրադարձություններին, ինչպես նաև կուսակցությունների կոչերին՝ 2022 թվականից սկսած Ռուսաստանի դեմ «երկրորդ ճակատ» բացելու։

Սահմանադրական դատարանը պետք է հայցը քննի ինը ամսվա ընթացքում։

Թարգմանությունը՝ Էմմա Չոբանյանի