31.10.2026 | 22:55
Հայտնաբերվել է զինծառայողի դի. ՊՆ
«Շկոդաներ»-ից 40-ը անպիտան են․ շուրջ 500 մլն-ով գնված մեքենաները 4-րդ տարում հանում են շահագործումից. ՏԵՍԱՆՅՈՒԹ
Քաղաքականություն
30.10.2025 | 20:05
2021 թվականին ներդրվեց պարեկային ծառայություն։ Պետությունը «Շկոդա» մակնիշի 150 ավտոմեքենա էր գնել՝ յուրաքանչյուրի համար վճարելով ավելի քան 12 մլն 750 հազար դրամ։ Չորս տարի անց դրանցից 39-ը կփոխանցվի Պետգույքի կառավարման կոմիտեին․ 30-ը՝ անսարք, մնացածը՝ վթարված վիճակում։
«Գնահատվել են թվով 39 տրանսպորտային միջոցներ, իսկ 1 միավոր եղել է վթարված, մեքենայի վրայից բացակայել են կարևոր հանգույցներ և դետալներ, կորցրել է ապրանքային տեսքն ու նշանակությունը, ուստի հնարավոր չի եղել այն գնահատել որպես տրանսպորտային միջոց»,- նշված է ՆԳ նախարարության որորշման մեջ։
Factor TV-ի գրավոր հարցմանն ի պատասխան՝ ՆԳՆ-ից հայտնել են, որ ավտոմեքենաներից 30-ը շարժիչի և փոխանցման տուփի անսարքություններ ունեն, այդ պատճառով են շահագործման համար ոչ ենթակա ճանաչվել։ «Վարորդի ընկեր» ՀԿ ղեկավար Տիգրան Քեյանն ասում է՝ «Շկոդա»-ների գնումն անարդյունավետ է եղել։
Պարեկային ծառայության ներդրումից ընդամենը 6 ամիս անց գրել էինք, որ 150 Skoda Octavia մակնիշի ավտոմեքենաներից 23-ը չի շահագործվում վթարի, իսկ 32-ը՝ փոխանցման տուփի սելեկտորի անսարքության հետևանքով։ Ոստիկանության բարեփոխումների համակարգող խորհրդի և պարեկային ծառայության ընդունելության հանձնաժողովի անդամ Դանիել Իոաննիսյանը նշում է՝ փոխանցման տուփի խնդիր մեքենաներն իսկապես ունեցել են, բայց դրանք փոխվել են երաշխիքային սպասարկման շրջանակում։
Երաշխիքային ժամկետը եղել է 3 տարի կամ 150․000 կմ վազքը: Մեկ միավորի տարեկան սպասարկման միջին ծախսը, ըստ ՆԳՆ-ի, կազմում է 655,000 ՀՀ դրամ։ Շահագործման համար ոչ ենթակա ճանաչված 40 «Շկոդա»-ների ձեռքբերումը հարկատուների վճարած միջոցներից արժեցել է մոտ կես միլիարդ դրամ։ Չնայած քննադատություններին՝ Իոաննիսյանը նշում է․ ծառայության բնույթից ելնելով՝ 4 տարվա շահագործումը նորմալ է ոստիկանական մեքենաների համար։
Մեկ «Շկոդա»-ի միջին վազքը, մինչ Պետգույքի կառավարման կոմիտե ներկայացնելը, կազմել է միջինը 170,000 կմ, իսկ ամենափոքր վազքը կազմել է 14,540 կմ՝ հայտնում են ՆԳՆ-ից։ Տիգրան Քեյանն ասում է՝ այդքան վազքը մեքենան շահագործումից հանելու պատճառ չէր կարող լինել։
Ոստիկանությունը «Շկոդա» ավտոմեքենաները գնել էր «Չեխ ավտո» ՍՊԸ-ից՝ մեկ անձից գնման ընթացակարգով։ Factor TV-ն իրավաբանական անձանց պետական ռեսգիստրից տեղեկանում է՝ ընկերության սեփականատերն այդ ժամանակ Կառավարությանն առընթեր Քաղաքացիական ավիացիայի գլխավոր վարչության նախկին պետ Արտյոմ Մովսեսյանի կինն է եղել՝ Ալբինա Մովսեսյանը։
Պետգույքի կառավարման կոմիտեից տեղեկացանք, որ հանձնման-ընդունման գործընթաց դեռևս տեղի չի ունեցել։ Այդ գործընթացից հետո մեքնենաները կներկայացվեն աճուրդի պետգույքի էլեկտրոնային աճուրդների համակարգում։ Ամենացածր մեկնարկային արժեքով մեքենան 2 միլիոն 670 հազար դրամ է, իսկ ամենաթանկը՝ 4 միլիոն 725 հազար դրամ։
Մանրամասները՝ տեսանյութում։
Արփի Հակոբյան
