ՌԴ զորքերը հարվածել են ուկրաինական Չեռնիգովի և Դնեպրոպետրովսկի մարզերին․ վնասվել են էներգետիկ օբյեկտներ և երկաթուղին

Ուկրաինայի Դնեպրոպետրովսկի մարզում ռուսական հարձակումների հետևանքով հինգ մարդ է վիրավորվել։ Այս մասին հայտնել է ռազմական վարչակազմի ղեկավար Սերգեյ Լիսակը, գրում է Current time-ը։

Նրա փոխանցմամբ՝ ռուսական բանակը նախ հարվածել է Զելենոդոլսկի քաղաքային համայնքին, ապա Նովոպիլսկա գյուղական համայնքին։ Վիրավորվել են մեկ տղամարդ և մեկ կին։ Վնասվել են ենթակառուցվածքները։ Բացի այդ, Նիկոպոլին  և Մարգանեցին հարվածների հետևանքով վիրավորվել են 18-ամյա աղջիկ և 26 և 45 տարեկան տղամարդիկ։ Բոլոր տուժածները հոսպիտալացվել են։

Վնասվել են մեկ բիզնես, մեկ կրոնական կազմակերպության շենք, 15 մասնավոր տուն, հինգհարկանի շենք, երեք օժանդակ շինություն, վեց մեքենա և գազատար։

Սինելնիկովսկի շրջանում անօդաչու թռչող սարքերի հարվածներից տուժել են Մեժևսկայա և Պոկրովսկայա համայնքները։ Բնակելի շենքի պատշգամբում հրդեհ է բռնկվել։ Այն մարվել է։ Մասնավոր տունը մասամբ փլուզվել  է, իսկ վեց այլ տուն վնասվել է, գրել է Լիսակը։

«Ուկրզալիզնիցիան» հայտնել է, որ Նոսիվկա-Նիժին երկաթուղային կայարանին Ռուսաստանի կողմից իրականացված հարվածների պատճառով Սումի-Լվով և Ուժգորոդ-Խարկով գնացքները երկու ժամ ուշացել են: Փոփոխված երթուղիներով կշարունակեն գործել ևս վեց միջտարածաշրջանային և երկու տարածաշրջանային գնացքներ։

Չեռնիգովի մարզի Նիժինի շրջանում գտնվող էներգետիկ օբյեկտը ենթարկվել է հարձակման, որի հետևանքով ավելի քան 4500 բաժանորդ մնացել է առանց էլեկտրաէներգիայի, հայտնում է «Չեռնիգիվոբլենէրգո»-ն։

Չեռնիգովի մարզի Նիժինիի քաղաքապետ Ալեքսանդր Կոդոլան հայտնել է, որ ռուսական ուժերն օգտագործել են 12 «Շահեդ» անօդաչու թռչող սարքեր՝ Նոսիվկա-Նիժին գծում գտնվող բեռնատար գնացքին հարվածելու համար։ Հարվածի հետևանքով վնասվել է Նիժինը Կիևի հետ կապող գծի երկաթուղին։

Ուկրաինայի ռազմաօդային ուժերի հրամանատարությունը հայտնել է, որ հոկտեմբերի լույս 8-ի գիշերը Ռուսաստանն Ուկրաինայի վրա արձակել է տարբեր տեսակի 183 անօդաչու թռչող սարք, որից 154-ը հաջողվել է չեզոքացնել։

Թարգմանությունը՝ Էմմա Չոբանյանի