ԱՄՆ-ում տղամարդը եկեղեցու մոտ հարձակվել է հավաքվածների վրա, ապա հրդեհել այն

ԱՄՆ Միչիգան ​​նահանգի մորմոնական եկեղեցում հրաձգություն է տեղի ունեցել, որից հետո շենքում հրդեհ է բռնկվել։ Euronews-ի հաղորդմամբ՝ տեղի ոստիկանապետը լրագրողներին հայտնել է, որ 40-ամյա մի տղամարդ մեքենայով մխրճվել է Գրանդ Բլանում գտնվող Հիսուս Քրիստոսի վերջին օրերի սրբերի եկեղեցու դարպասների մեջ, որտեղ հավաքված են եղել  հարյուրավոր մարդիկ։ Այնուհետև նա դուրս է եկել մեքենայից և անկանոն կրակ բացել։

Նախնական տեղեկությունների համաձայն՝ դրանից հետո տղամարդը հրկիզել է եկեղեցին։ Դեպքի վայր ժամանած ոստիկանները ոչնչացրել են հարձակվողին, ասել է ոստիկանապետը։

Հարձակման հետևանքով զոհվել է եկեղեցու 4 այցելու, ևս 8-ը՝ վիրավորվել, որոնցից մեկը ծանր վիճակում է։

«Բռնությունը ցանկացած վայրում, հատկապես, պաշտամունքի վայրում, անընդունելի է»,- անդրադառնալով ողբերգական միջադեպին՝ ասել է Միչիգանի նահանգապետ Գրետխեն Ուիթմերը

Ոստիկանությունը հայտարարել է, որ հետաքննում է տղամարդու արարքի դրդապատճառը: Ըստ տվյալների՝ հարձակվողը 40-ամյա Թոմաս Ջեյքոբ Սանֆորդն է, նախկին ծովային հետևակային։ Նա ծառայել է Իրաքում, որտեղ ստացել է մի քանի պարգև, այդ թվում՝ Գլոբալ ահաբեկչության դեմ պայքարի ծառայության համար մեդալ։

ԱՄՆ նախագահ Դոնալդ Թրամփը սոցիալական ցանցերում գրել է, որ իրեն տեղեկացրել են կրակոցների մասին։

«Ինձ տեղեկացրել են Միչիգան ​​նահանգի Գրանդ Բլան քաղաքում գտնվող Հիսուս Քրիստոսի վերջին օրերի սրբերի եկեղեցում տեղի ունեցած սարսափելի կրակոցների մասին։ ՀԴԲ-ն անմիջապես ժամանել է դեպքի վայր և առաջատար դեր կխաղա դաշնային հետաքննության մեջ, լիովին կհամագործակցի նահանգային և տեղական պաշտոնյաների հետ»,- գրել է նա։

Թրամփը միջադեպն անվանել է Միացյալ Նահանգներում քրիստոնյաների դեմ ուղղված նպատակային հարձակում։

Գրանդ Բլան քաղաքը, որը մոտավորապես 8000 բնակիչ ունի, գտնվում է Դեթրոյթից մոտավորապես 100 կիլոմետր հյուսիս։