25.08.2026 | 20:00
«Թուրքական ռազմաբազա Գյումրիո՞ւմ»․ կեղծ տեսանյութի տարածման հետքերով. ՏԵՍԱՆՅՈՒԹ
Factor TV-ի հրապարակումից հետո Վաղարշապատի շենքերից մեկի վնասված խողովակները նորոգում են․ բնակիչները 2 տարի է՝ ահազանգում էին
Հասարակություն
24.09.2025 | 14:00
Ավելի քան երկու տարի Վաղարշապատի Լեոնիդ Ազգալդյան 1 հասցեում գտնվող 5 հարկանի շենքի բնակիչները պատկան մարմիններին պարբերաբար դիմում էին ներկայացնում՝ նշելով, որ 2010 թվականից վթարային շենքի տակով անցնող խողովակները, ըստ երևույթին, վթարվել են, ինչի հետևանքով անդադար ջուր է հոսում նկուղ և իրենց բնակարաններ։
Factor TV-ն սեպտեմբերի 12-ին այցելել էր շենք, որտեղ առաջին հարկի բնակիչները ցույց էին տվել նկուղում անդադար հոսող ջրի պատճառով իրենց բնակարանների սարսափելի պատկերը․ խոնավությունից պատերին պարբերաբար սնկեր էին աճում, տներում ամենուր խավարասերներ ու այլ միջատներ էին, չէր վերանում խոնավության ծանր հոտը։
Շենքի բնակիչները պատմում էին, որ տարիներ շարունակ պարտաճանաչ վճարում են գույքահարկը և շենքի պահպանության համար նախատեսված հարկը, բայց որևէ բարեկարգում այս տարիների ընթացքում չեն տեսել։
Խողովակները վնասվելուց հետո երկու տարի շարունակ բնակիչները դիմել են ամենատարբեր պատկան մարմինների, որևէ արդյունքի չհասնելուց հետո՝ նախորդ տարեվերջին դիմում են գրել նաև Նիկոլ Փաշինյանին։ Վարչապետի աշխատակազմն իր հերթին դիմել է Վաղարշապատի համայնքապետարան, որտեղից եկել են, ուսումնասիրել խնդիրը, բայց՝ կրկին անարդյունք։
Factor TV-ն խնդրի հետ կապված դիմել էր Վաղարշապատի համայնքապետարան, որտեղից մեզ փոխանցել էին, որ խնդրի կարգավորման համար մրցույթ են հայտարարել, սեպտեմբերի 3-ին արդեն հաղթող ընկերություն է ընտրվել, ինչը նշանակում է, որ առաջիկայում կսկսվեն նորոգման աշխատանքները։
Բնակիչները, սակայն, այդքան էլ լիահույս չէին։ Ասում էին՝ նման խոստումներ շատ են լսել։ Սակայն խնդրի բարձրաձայնումից 12 օր անց Factor TV-ին զանգահարել է բնակիչներից մեկն ու տեղեկացրել, որ մեր հրապարակումից հետո խողովակների նորոգման աշխատանքները վերջապես սկսվել են։
Ռոզա Վարդանյան
