01.04.2026 | 17:33
Քննչական կոմիտեի նախագահի հրամանով 30 քննիչ է նշանակվել
ԱԱԾ տնօրենը Բաքվից վերադարձել է Երևան․ կառույցն այցի վերաբերյալ մանրամասներ չի հայտնում
22.09.2025 | 11:55
ԱԱԾ տնօրեն Անդրանիկ Սիմոնյանը երեկ երեկոյան ժամը 20:00-ին Բաքվից վերադարձել է Երևան։ Factor.am-ը flightradar24.com կայքից տեղեկացավ, որ Սիմոնյանին Ադրբեջանից Հայաստան տեղափոխող ինքնաթիռը Բաքվի օդանավակայանից թռել է ժամը 19:00-ին և 20:00-ին վայրէջք կատարել Երևանի «Զվարթնոց» օդանավակայանում։
Ավելի վաղ տեղեկացրել էինք, որ ԱԱԾ տնօրենը Բաքու է մեկնել Gulfstream G450 բիզնես դասի ինքնաթիռով, որը պատկանում է FlyOne ավիաընկերությանը։ Այս ընկերության 50 տոկոսը պատկանում է ԱԺ ՔՊ-ական պատգամավոր Խաչատուր Սուքիասյանի ընտանիքին։
Հիշեցնենք՝ ԱԱԾ-ն հայտնել է, որ հատուկ ծառայության ղեկավարը Բաքու է մեկնել՝ մասնակցելու «Անվտանգության 3-րդ միջազգային ֆորումին»։ Թե այցի շրջանակում ԱԱԾ տնօրենն ինչ հանդիպումներ է ունեցել, ինչ հարցեր է քննարկել, հանրությանը չի ներկայացվում։ ԱԱԾ-ն միայն Սիմոնյանի մեկնելու վերաբերյալ է տեղեկություն տարածել։
Factor.am-ը ԱԱԾ մամուլի կենտրոնից հետաքրքրվեց՝ արդյո՞ք լինելու է պաշտոնական հաղորդագրություն Սիմոնյանի այցի հետ կապված, գերատեսչությունից առաջարկեցին հետևել ԱԱԾ պաշտոնական լրահոսին։ Գերատեսչության պաշտոնական կայքի լրահոսի բաժինը վերջին անգամ թարմացվել է երեք օր առաջ։
Ուշագրավ է, որ ադրբեջանական լրատվամիջոցներում «Անվտանգության 3-րդ միջազգային ֆորում»-ից հրապարակվել է միայն Ադրբեջանի նախագահ Իլհամ Ալիևի ելույթը։ Չկան այլ կադրեր, որոնցից պարզ կդառնար, թե ովքեր են մասնակցել Բաքվում կայացած միջոցառմանը կամ ինչ ելույթներ են հնչել։
Նարեկ Կիրակոսյան
