Պորտուգալիան նույնպես պաշտոնապես ճանաչել է Պաղեստինը

Պորտուգալիան պաշտոնապես ճանաչել է Պաղեստին պետությունը։ Սեպտեմբերի 21-ի ուշ երեկոյան այդ մասին հայտարարել է երկրի ԱԳ նախարար Պաուլու Ռանժելը, գրում է DW-ի ռուսական ծառայությունը։

«Պորտուգալիան աջակցում է լուծմանը, որը ենթադրում է երկու պետությունների ստեղծում՝ որպես արդար և երկարատև խաղաղության միակ ուղի (պաղեստինա-իսրայելական հակամարտության մեջ)»,- ընդգծել է նա։

Միաժամանակ, Ռանժելը շեշտել է Պորտուգալիայի հանձնառությունը՝ ճանաչելու Իսրայել պետության գոյության իրավունքը: Նա նաև նշել է «պորտուգալացի և իսրայելցի ժողովուրդների միջև հատուկ բարեկամությունը» և ասել, որ Լիսաբոնը դատապարտում է «ՀԱՄԱՍ»-ի կողմից հոկտեմբերի 7-ին կատարված «սարսափելի ահաբեկչական հարձակումները»։

Դիվանագետը նաև պահանջել է անհապաղ ազատ արձակել իսլամիստ զինյալների կողմից պահվող իսրայելցի պատանդներին և զոհված պատանդների մարմինները վերադարձնել իրենց ընտանիքներին՝ կրկնելով հակասեմականության ցանկացած դրսևորման դեմ պայքարելու իր կոչը:

Հավելենք, որ երեկ ավելի վաղ Կանադան, Ավստրալիան և Մեծ Բրիտանիան էին հայտարարել Պաղեստին պետության ճանաչման մասին: Մեծ Բրիտանիայի վարչապետ Քիր Սթարմերը շեշտել էր, որ երկու պետությունների լուծումը «ՀԱՄԱՍ-ի  համար պարգև չէ, քանի որ դա նշանակում է, որ ՀԱՄԱՍ-ն ապագա չունի, դեր չունի կառավարությունում, դեր չունի անվտանգության մեջ»: Ավստրալիայի վարչապետ Էնթոնի Ալբանեզեն և Կանադայի վարչապետ Մարկ Քարնին նմանատիպ հայտարարություններ էին արել։

Մի շարք այլ արևմտյան երկրներ, այդ թվում՝ Ֆրանսիան, Բելգիան, Մալթան և Լյուքսեմբուրգը, հայտարարել են Պաղեստինի պետությունը ճանաչելու իրենց մտադրության մասին ՄԱԿ-ի Գլխավոր վեհաժողովի տարեկան նստաշրջանի ժամանակ:

Իսրայելի նախագահ Իսահակ Հերցոգը քննադատել է Կանադայի, Ավստրալիայի և Մեծ Բրիտանիայի կողմից Պաղեստին պետությունը ճանաչելու որոշումը՝ որպես քայլ, որը «չի օգնի ոչ մի պաղեստինցու», «չի օգնի ազատել ոչ մի պատանդի» և «չի օգնի համաձայնության հասնել իսրայելցիների և պաղեստինցիների միջև»։

Իսրայելի վարչապետ Բենիամին Նեթանյահուն, իր հերթին, հայտարարել է Արևմտյան ափին հրեական բնակավայրերն ընդլայնելու մտադրության մասին։

«Ես հստակ ուղերձ ունեմ այն ​​առաջնորդներին, որոնք հոկտեմբերի 7-ի սարսափելի կոտորածից հետո ճանաչում են Պաղեստինի պետությունը. դուք հսկայական պարգև եք տալիս ահաբեկչության։Եվ ես ևս մեկ ուղերձ ունեմ ձեզ համար. դա տեղի չի ունենա: Պաղեստինյան պետություն չի ստեղծվի Արևմտյան ափին»,- ասել է նա:

Ավելի վաղ կաբինետի հերթական նիստի ժամանակ Նեթանյահուն հայտարարել էր, որ Պաղեստին պետության ստեղծումը վտանգ է ներկայացնում Իսրայելի գոյության համար:

Թարգմանությունը՝ Էմմա Չոբանյանի