Վաշինգտոնում Ադրբեջանի և Հայաստանի միջև ստորագրված հռչակագիրը պատմական քայլ է հակամարտության դադարեցման համար․ Ալիև

Մենք հավատում ենք, որ կայունության և բարգավաճման կարելի է հասնել միայն երկխոսության և գործընկերության միջոցով: Ադրբեջանը կառուցողական քայլեր է ձեռնարկում Հարավային Կովկասում խաղաղություն և կայունություն ապահովելու համար։ Այս մասին ասվում է Ադրբեջանի նախագահ Իլհամ Ալիևի՝ նախօրեին տարածված ուղերձում՝ ուղղված Բաքվում անցկացված «Անվտանգության մարմինների փոխգործակցությունը հումանիտար ճգնաժամերի և գլոբալ տեխնածին աղետների կանխարգելման գործում ահաբեկչական հարձակումների և զինված հակամարտությունների ժամանակ» թեմայով  Բաքվի III անվտանգության միջազգային ֆորումի մասնակիցներին։

«Մեր հիմնական նպատակներից մեկը տարածաշրջանում համագործակցության նոր ձևաչափի ստեղծումն է՝ հիմնված փոխադարձ վստահության, անվտանգության և պրագմատիզմի վրա։ Մենք կարծում ենք, որ այս ուղղությամբ նպատակային ջանքերը խթան կհանդիսանան ապագայում հարևան երկրների միջև գործընկերության հետագա ամրապնդման համար»,- նշել է Ալիևը։

Նա նաև անդրադարձել է Վաշինգտոնում օգոստոսի 8-ին ՀՀ-ի և Ադրբեջանի միջև փաստաթղթերի ստորագրմանը։

«2025 թվականի օգոստոսի 8-ին Վաշինգտոնում ԱՄՆ-ի հովանու ներքո ստորագրվել է Ադրբեջանի և Հայաստանի միջև համատեղ հռչակագիր։ Այդպիսով, արվել է կարևոր պատմական քայլ մեր երկրների միջև երկարատև հակամարտության դադարեցման և խաղաղության համաձայնագրի կնքման ուղղությամբ։ Հարավային Կովկասում խաղաղության լիարժեք ապահովումը նոր հնարավորություններ կստեղծի համագործակցության համար ոչ միայն մեր տարածաշրջանում, այլև Կենտրոնական Ասիայում, Մերձավոր Արևելքում և Եվրոպայում»,- հայտարարել է Ադրբեջանի նախագահը։

Ալիևի ուղերձում նաև նշվում է, որ Բաքվի անվտանգության ֆորումը միջազգային միջոցառում է՝ յուրահատուկ ձևաչափով՝ գլոբալ և տարածաշրջանային սպառնալիքներն ու ռիսկերը բացահայտելու և դրանք չեզոքացնելու ուղիներն ուսումնասիրելու համար:

Հիշեցնենք, որ  ՀՀ ԱԱԾ-ն ավելի վաղ հայտնել էր, որ Հայաստանի ազգային անվտանգության ծառայության տնօրեն Անդրանիկ Սիմոնյանի գլխավորած պատվիրակությունը սեպտեմբերի 19-ից 21-ը մասնակցելու է Բաքվում կայանալիք «Անվտանգության 3-րդ միջազգային ֆորումին»:

Բաքվի առաջին անվտանգության ֆորումը կազմակերպվել է Ադրբեջանի պետական ​​անվտանգության ծառայության կողմից 2023 թվականի մայիսի 3-ին, որին մասնակցել են տարբեր երկրներից հետախուզական և անվտանգության ծառայությունների ղեկավարներ և բարձրաստիճան ներկայացուցիչներ։

Թարգմանությունը՝ Էմմա Չոբանյանի