29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Միացյալ Նահանգները կանգնած է Հայաստանի կողքին՝ որպես արժեքավոր գործընկերոջ. Մարկո Ռուբիո
Քաղաքականություն
21.09.2025 | 14:55
ԱՄՆ պետքարտուղար Մարկո Ռուբիոն շնորհավորական ուղերձ է հղել Հայաստանի ժողովրդին Անկախության 34-րդ տարեդարձի առթիվ։
«Ամերիկայի Միացյալ Նահանգների անունից շնորհավորում եմ Հայաստանի ժողովրդին Անկախության 34-րդ տարեդարձի կապակցությամբ։
Միացյալ Նահանգները կանգնած է Հայաստանի կողքին՝ որպես մեր արժեքավոր գործընկերոջ, երբ մենք միասնաբար առաջ ենք մղում մեր ընդհանուր նպատակները՝ խաղաղության, բարեկեցության և կայունության ապահովման ուղղությամբ Հարավային Կովկասում։ Մեր կայուն և ամուր հարաբերությունները հիմնված են հզոր մշակութային կապերի, համատեղ սկզբունքների և տարածաշրջանային անվտանգությունն ու տնտեսական հնարավորությունները խթանելու փոխադարձ ձգտման վրա։
Նախագահ Թրամփի նշանակալի գագաթնաժողովը Հայաստանի և Ադրբեջանի միջև, ինչպես նաև ԱՄՆ-ի հայտարարած 145 միլիոն դոլարի աջակցությունը՝ ուղղված «Թրամփի ուղի հանուն միջազգային խաղաղության և բարեկեցության» (TRIPP) ծրագրի իրագործմանը, ընդգծում են մեր երկրի անխախտ հանձնառությունը Հայաստանի նկատմամբ և միևնույն ժամանակ կարևորում են մեր համատեղ ջանքերը՝ ուղղված տարածաշրջանային փոխկապվածության, տնտեսական ներդրումների և անվտանգության համագործակցության խթանմանը։ Մենք ուրախ ենք աջակցել Հայաստանին էներգետիկ անվտանգության բարձրացման, առևտրի ընդլայնման և սահմանների պաշտպանության ուժեղացման հարցում՝ միաժամանակ վերահաստատելով մեր հավատարմությունը Հայաստանի ինքնիշխանությանն ու տարածքային ամբողջականությանը։ Ռազմավարական գործընկերությունն ու նախագահ Թրամփի և Վարչապետ Փաշինյանի կողմից ստորագրված երկկողմ համաձայնագրերը հանդիսանում են մեր համագործակցության հիմնասյուները՝ ուղղված այս ընդհանուր նպատակների առաջխաղացմանը։
Քանի որ Հայաստանը շարունակում է կերտել իր ապագան՝ որպես խաղաղության և զարգացման խաչմերուկ, Միացյալ Նահանգները վերահաստատում է իր հավատարմությունը՝ ավելի փոխկապված, կայուն և բարեկեցիկ տարածաշրջան ունենալու տեսլականին»։
