Արտոնյա՞լ է Արսեն Թորոսյանը․ ՊՊԾ-ն հատուկ տեսագրություն է տրամադրում ՔՊ-ականին, իսկ լրագրողին՝ ոչ. ՏԵՍԱՆՅՈՒԹ

Պետական պահպանության ծառայության տեսախցիկները, որոնք տեղադրված են Հայաստանի կառավարության շենքի տարբեր հատվածներում՝ անվտանգության ապահովման նկատառումներով, ֆիքսել են կադրեր, որոնցում ՔՊ-ական Արսեն Թորոսյանն է։ Նա հատուկ ծառայության վերահսկողության ներքո գտնվող տեսախցիկների կադրերը հրապարակել էր՝ ապացուցելու, որ Կառավարության շենք մտնելիս անհետ կորած զինծառայողների հարազատների հետ կոնֆլիկտ չի ունեցել, ինչպես պնդել էր լրատվամիջոցներից մեկը։

Այստեղ, սակայն, ուշադրության է արժանի մեկ այլ հանգամանք․ ինչպե՞ս է Փաշինյանի թիմակցի ձեռքում հայտնվել ՊՊԾ-ի տեսանկարահանումը։

Իսկ ի՞նչ հիմնավորմամբ և ի՞նչ ընթացակարգով է Արթուր Գասպարյանի ղեկավարած կառույցնԱրսեն Թորոսյանին տեսագրություններ տրամադրել։ Դեռ պատգամավորի կարգավիճակում թեմայի շուրջ պարզաբանումներ ներկայացրած Թորոսյանը հակված չէր բովանդակային պատասխաններ տալ։

Պարզելու համար՝ արդյո՞ք ՊՊԾ-ն բոլոր քաղաքացիներին է, խնդրանքի դեպքում, տրամադրում կառավարության մուտք ու ելքի տեսագրությունները, դիմեցինք գերատեսչությանը։ Գրավոր հարցմամբ տեղեկացրել էինք կառավարությունում հավատարմագրված լինելու մասին և խնդրել տրամադրել հստակ օրվա տեսագրություն, որով ֆիքսվել է լրագրողի մուտքն ու ելքը ՀՀ կառավարության շենք։ ՊՊԾ պետը, անվտանգային մի շարք խնդիրներ մատնանշելով, մերժել է տեսագրության տրամադրումը։

ՊՊԾ պետ Արթուր Գասպարյանի անունից փոխանցված պատասխանում նշվում է, որ հայցվող տեսագրության տրամադրումը հնարավոր չէ, քանի որ կարող են բացահայտվել պետական պահպանության իրականացման գործունեության բացահայտ և գաղտնի մեթոդներն ու միջոցները։

ՊՊԾ պետի այսօրինակ պատասխանը տարակուսանք է առաջացնում։ Ինչպե՞ս է հնարավոր, որ նույն տեսախցիկի միջոցով նույն մուտքի և ելքի արձանագրած կադրերի տրամադրումը մի դեպքում կարող է առաջացնել անվտանգային խնդիրներ, իսկ մեկ այլ դեպքում՝ ոչ։ Ստացվում է՝ հատկապես ՔՊ-ական պաշտոնյային տրամադրված տեսագրությունը, ՊՊԾ-ի ղեկավարության տրամաբանությամբ, չէր կարող բացահայտել պետական պահպանության իրականացման գործունեության բացահայտ և գաղտնի մեթոդներն ու միջոցները։ Արսեն Թորոսյանն իրեն տեսանյութի տրամադրումը, իսկ անկախ լրատվամիջոցին՝ մերժումը, խտրական մոտեցում չի համարում։

Երևանի մամուլի ակումբի պատվո նախագահ Բորիս Նավասարդյանը շեշտում է՝ պաշտոնյաներն արտոնյալ կարգավիճակ ունեն, այս դեպքում անկախ նրանից՝ օրենքը թո՞ւյլ է տալիս, թե՞ ոչ, բայց Թորոսյանին տրամադրվել են այդ կադրերը։

Ըստ Նավասարդյանի՝ ՊՊԾ-ի հիմնավորումն արժանահավատ չէ։ Եթե տեսագրության տրամադրումը կարող է հանգեցնել ՊՊԾ-ի կողմից իրականացվող անվտանգության ապահովման մեթոդների բացահայտմանը, ապա ստացվում է, որ վտանգելով թե՛ Փաշինյանի, թե՛ Կառավարության մյուս անդամների անվտանգությունը, ՊՊԾ-ն Արսեն Թորոսյանին տեսագրություն է տրամադրել։

Մանրամասները՝ տեսանյութում։

Նարեկ Կիրակոսյան