20.02.2026 | 20:32
Խուզարկություններ` Երևանի շուրջ 40 հասցեներում
«Էս մեր Սուրոյին էիր քրֆո՞ւմ»․ կինը պնդում է՝ ամուսնուն ծեծել են Կադաստրի կոմիտեի ղեկավարի ցուցումով, կոմիտեից հերքում են․ ՏԵՍԱՆՅՈՒԹ
Հասարակություն
16.09.2025 | 19:46
Կադաստրի կոմիտեի նախկին աշխատակից Վերոնիկա Միքայելյանն ահազանգում է ամուսնու դաժան ծեծի մասին։ Նա Factor TV-ի հետ զրույցում պնդում է՝ ամուսնուն՝ Արթուրին, ֆիզիկական բռնության են ենթարկել Կադաստրի կոմիտեի ղեկավար Սուրեն Թովմասյանի ցուցումով։
Ըստ Վերոնիկա Միքայելյանի՝ ամուսնուն ծեծի են ենթարկել այն բանից հետո, երբ ծառայողական երկրորդ նկատողությունից հետո իրեն ազատել են Կադաստրի կոմիտեի արտաքին վարչության ավագ մասնագետի պաշտոնից, իսկ ամուսինը հայհոյախառն բառապաշարով ձայնային հաղորդագրություն է ուղարկել Սուրեն Թովմասյանին։
Ըստ կնոջ՝ ամուսնուն խաբեությամբ տարել են քաղաքից դուրս, որտեղ, կրկին կնոջ փոխանցմամբ, ամուսինը խմբված անձանցից ճանաչել է Ռոման անունով մի տղամարդու։ Վերոնիկայի խոսքով՝ Ռոմանը փոխկապակցված է Սուրեն Թովմասյանի հետ։
Վերոնիկա Միքայելյանը պնդում է, որ Կադաստրի կոմիտեի ղեկավարի և գլխավոր քարտուղար Մհեր Խաչատրյանի ցուցումով ամուսնուն բռնության ենթարկելու ընթացքում անդադար հարվածներ են հասցրել ամուսնու դեմքին և կոտրել քիթը։
Արդեն երկու օր տարածվող այս տեղեկությունների վերաբերյալ փորձեցինք մեկնաբանություն ստանալ թե՛ Սուրեն Թովմասյանից, թե՛ Մհեր Խաչատրյանից։ Աշխատանքային օրվա տարբեր ժամանակահատվածներում զանգահարեցինք նրանց աշխատանքային համարներով։ Ի պատասխան՝ մեզ փոխանցեցին, որ Թովմասյանն ու Խաչատրյանն աշխատանքային քննարկման մեջ են։ Թեմայի վերաբերյալ դեռ երեկ երեկոյան հակիրճ մեկնաբանություն է տարածվել Կոմիտեի ֆեյսբուքյան էջում։
Թե չճշտված տեղեկություններ տարածելուց խուսափելու խորհուրդներ տվող Սուրեն Թովմասյանն ինչո՞ւ չի ցանկանում թեմային ուղիղ անդրադառնալ, անհասկանալի է։ Ենթադրյալ ծեծի ենթարկված տղամարդու կինն էլ իր հերթին է Կադաստրի կոմիտեի տարածած հաղորդագրությունը կեղծիք համարում։
Տղամարդուն ծեծի ենթարկելու դեպքով Քննչական կոմիտեում վարույթ է նախաձեռնվել։ Կառույցից Factor TV-ին փոխանցեցին, որ վարույթը նախաձեռնվել է Քրեական օրենսգրքի 195-րդ հոդվածի 2-րդ մասի 5-րդ կետով՝ մի խումբ անձանց կողմից ֆիզիկական ներգործությունը և 191-րդ հոդվածի 2- րդ մասի 5-րդ կետով՝ մի խումբ անձանց կողմից մարդուն առևանգելը: Կատարվում է նախաքննություն։
Ըստ ՔԿ-ի՝ գործով անցնող անձինք չկան։ Կառույցից չեն հստակեցնում՝ Սուրեն Թովմասյանին կանչե՞լ են ՔԿ, թե՞ ոչ։
Մանրամասները՝ տեսանյութում։
Նարեկ Կիրակոսյան
