Վրաստանում ձերբակալվել է ընդդիմության առաջնորդներից Լևան Խաբեիշվիլին

Վրաստանի Պետական ​​անվտանգության ծառայությունը (ՊԱԾ) ձերբակալել է ընդդիմադիր «Միասնություն՝ Ազգային շարժում» կուսակցության առաջնորդներից մեկին՝ Լևան Խաբեիշվիլիին։ Այս մասին հայտնել է լրագրող Միշա Մշվիլդաձեն, որը հրապարակել է ձերբակալման տեսանյութը։

«(Պետական ​​անվտանգության ծառայության ղեկավար Մամուկա) Մդինարաձեն կատարում է իրեն տրված առաջադրանքը: Ուժը վրացի ժողովրդի մեջ է: Ես սպասում էի դրան: Ինձ ձերբակալում են, քանի որ պարզվում է, որ մեկ անձ՝ Խաբեիշվիլին, կարող է հաղթել Իվանիշվիլիին: Դուք կարող եք հաղթել Իվանիշվիլիին՝ այս ռեժիմին», – ասել է Խաբեիշվիլին ձերբակալումից առաջ։

Պետական ​​անվտանգության ծառայությունը հաստատել է ձերբակալության մասին լուրը՝ առանց մանրամասներ բացահայտելու։

Ավելի վաղ Լևան Խաբեիշվիլին հայտարարել էր «խաղաղ հեղափոխության» մասին հոկտեմբերի 4-ին․ այդ օրը երկրում նշանակված են տեղական ինքնակառավարման մարմինների ընտրություններ։ Վրաստանի նախկին  նախագահ Միխեիլ Սաակաշվիլիի կողմից հիմնադրված «Ազգային շարժումը» բոյկոտում է քվեարկությունը։

Հիշեցնենք, որ սեպտեմբերի 5-ին Վրաստանի նախագահ Միխեիլ Ղավելաշվիլին ներում էր շնորհել «Լելո» կուսակցության առաջնորդներին՝ Մամուկա Խազարաձեին և Բադրի Ջափարիձեին: Ընդդիմադիր քաղաքական գործիչներ Գիորգի Վաշաձեն, Նիկա Գվարամիան, Իրակլի Օկրուաշվիլին, Զուրաբ Ջափարիձեն, Նիկա Մելիան և Գիվի Թարգամաձեն մնում են կալանքի տակ։

Նախկին նախագահ Միխեիլ Սաակաշվիլին նույնպես կալանքի տակ է, և վերջին դատավճռի համաձայն՝ նա բանտում կմնա մինչև 2034 թվականի ապրիլի 1-ը։

Թարգմանությունը՝ Էմմա Չոբանյանի