Վրաստանի նախագահը ներում է շնորհել ընդդիմադիր գործիչների․ նրանք կմասնակցեն ՏԻՄ ընտրություններին

Վրաստանի նախագահ Միխեիլ Ղավելաշվիլին, որի լեգիտիմությունն ընդդիմություն չի ճանաչում, ներում է շնորհել ընդդիմադիր «Լելո ՝ Ուժեղ Վրաստան» կուսակցության առաջնորդներ Բադրի Ջափարիձեին և Մամուկա Խազարաձեին, գրում է Current time-ը։ Ջափարիձեն և Խազարաձեն, ինչպես նաև վեց այլ ընդդիմադիրներ դատապարտվել էին խորհրդարանական քննիչ հանձնաժողովի պահանջները չկատարելու համար։ Նրանք բոլորը դատապարտվել էին յոթից ութ ամսվա ազատազրկման։

«Լելո՝ Ուժեղ Վրաստան» կուսակցությունը գրանցվել է 2025 թվականի հոկտեմբերի 4-ին կայանալիք տեղական ինքնակառավարման մարմինների ընտրություններին մասնակցելու համար։ Ղավելաշվիլին հայտարարել է, որ որոշել է ներում շնորհել Ջափարիձեին և Խազարաձեին, «որպեսզի որևէ հիմք չլինի պնդելու, որ տեղական ինքնակառավարման մարմինների ընտրություններն անցկացվում են սահմանափակ մրցակցության պայմաններում»։

«Հույս եմ հայտնում,  ապագայում նրանք կշարունակեն իրենց քաղաքական գործունեությունը օրենքի նկատմամբ հարգանքով», – հավելել է նա։

Ընդդիմադիրների դեմ քրեական գործը հարուցվել է այն պատճառով, որ նրանք հրաժարվել են մասնակցել իշխող «Վրացական երազանք» կուսակցության նախաձեռնությամբ ստեղծված խորհրդարանական քննիչ հանձնաժողովի նիստերին։ Այն հետաքննում է Միխեիլ Սաակաշվիլիի նախագահության օրոք՝ 2003-2012 թվականներին, պաշտոնյաների կողմից կատարված հանցագործությունները։

«Ախալի» կուսակցության համահիմնադիր Նիկա Մելիան և այս կուսակցության առաջնորդ Նիկա Գվարամիան, ընդդիմադիր «Գիրչի» կուսակցության ղեկավար և «Փոփոխությունների համար կոալիցիայի» առաջնորդներից մեկը՝ Զուրաբ Ջափարիձեն, «Աղմաշենեբելի  ռազմավարության» առաջնորդ Գիորգի Վաշաձեն, պաշտպանության և անվտանգության խորհրդարանական կոմիտեի նախկին ղեկավար Գիվի Թարգամաձեն և պաշտպանության նախկին նախարար Իրակլի Օքրուաշվիլին կմնան կալանքի տակ։

Թարգմանությունը՝ Էմմա Չոբանյանի