22.05.2026 | 17:35
Օվերչուկը հայտարարել է, թե Մոսկվան ցանկանում է, որ Հայաստանը մնա ԵՏՄ-ում
Ճապոնիայի վարչապետ Սիգերու Իսիբան որոշել է հրաժարական տալ․ NHK
Քաղաքականություն
07.09.2025 | 12:39
Ճապոնիայի հանրային հեռարձակող NHK-ի տեղեկություններով՝ Ճապոնիայի վարչապետ Սիգերու Իսիբան որոշել է հրաժարական տալ խորհրդարանական ընտրություններում կրած պարտությունից հետո։
Լրագրողների փոխանցմամբ՝ Իսիբայի որոշումն ուղղված է իշխանություն ունեցող Լիբերալ-դեմոկրատական կուսակցության (ԼԴԿ) ներսում պառակտումը կանխելուն։ Այս տվյալները հաստատել է նաև Reuters գործակալության աղբյուրը։
Հուլիսին կայացած ընտրություններից հետո Իսիբայի գլխավորած կոալիցիան կորցրել է մեծամասնությունը Ճապոնիայի խորհրդարանի վերին պալատում։
Asahi Shimbun թերթը գրում է, որ շատ ճապոնացի քաղաքական գործիչներ կոչ էին անում Իսիբային հրաժարվել պաշտոնից, նշում է AFP-ն։
Վարչապետի գրասենյակի ներկայացուցիչը Reuters-ին տված հարցազրույցում չի հաստատել հրաժարականի մասին տեղեկությունը, սակայն երկրի կառավարությունը հայտարարել է, որ Իսիբան պատրաստվում է մամուլի ասուլիս տալ տեղական ժամանակով 18:00-ին (Գրինվիչի ժամանակով՝ 09:00-ին)։
Իսիբան Ճապոնիայի վարչապետ է դարձել միայն 2024 թվականի վերջում․ նա հաղթել է կուսակցական ներսում անցկացված ընտրություններում՝ այն բանից հետո, երբ նախկին վարչապետ Ֆումիո Կիսիդան հրաժարվեց վերընտրվելու մտադրությունից։
Այս տարվա հուլիսին խորհրդարանի վերին պալատի ընտրություններում քվեարկության էր դրվել 248 մանդատներից կեսը, սակայն իշխող կոալիցիան ստացել է միայն 47 մանդատ։
Այսպիսով, Լիբերալ-դեմոկրատական կուսակցությունը կորցրել է մեծամասնությունը վերին պալատում, թեև Իսիբան հայտարարել էր, որ չի նախատեսում հրաժարական տալ։
Անցած տարվա ստորին պալատի ընտրություններից հետո, երբ կոալիցիան նույնպես չկարողացավ ստանալ մեծամասնություն, ԼԴԿ-ին չհաջողվեց վերականգնել ընտրողների վստահությունը։
Ճապոնիայի Լիբերալ-դեմոկրատական կուսակցությունը գործնականում անընդմեջ կառավարում է երկիրը 1955 թվականից, թեև նրա ղեկավարները հաճախ են փոխվում։
