04.04.2026 | 20:03
ՃՏՊ՝ հրդեհի բռնկմամբ
Թրամփը Պաշտպանության նախարարությունը կվերանվանի Պատերազմի նախարարություն. այն կարող է միլիարդավոր դոլարներ արժենալ Վաշինգտոնի համար
Քաղաքականություն
06.09.2025 | 15:05
ԱՄՆ նախագահ Դոնալդ Թրամփը Պաշտպանության նախարարությունը կվերանվանի Պատերազմի նախարարություն` վերադարձնելով գերատեսչության նախկին անվանումը․ այս մասին Fox News Digital-ին հայտնել է Սպիտակ տան աղբյուրներից մեկը։
Հաղորդվում է, որ այս անվանումը կօգտագործվի որպես երկրորդական անվանում։
Ավելի վաղ և՛ Դոնալդ Թրամփը, և Պենտագոնի ղեկավար Փիթ Հեգսեթը հայտնել էին, որ ցանկանում են փոխել գերատեսչության անվանումը։ Ի դեպ, պաշտպանության նախարարն էլ կկոչվի պատերազմի նախարար։
ԱՄՆ պաշտպանության նախարարության վերանվանումը Պատերազմի նախարարության կարող է միլիարդավոր դոլարներ արժենալ Վաշինգտոնի համար․ «Արմենպրես»-ի հաղորդմամբ՝ այս հանգամանքին ուշադրություն է հրավիրել Politico թերթը։
Լրատվամիջոցը նշում է, որ այդ գումարի առյուծի բաժինը կարող է ուղղվել 40 երկրներում և ԱՄՆ բոլոր 50 նահանգներում Պենտագոնի ավելի քան 700 հազար օբյեկտների վրա այս գերատեսչության տարբերանշանների փոփոխմանը։ Սա ենթադրում է 6 զորատեսակների և Պենտագոնին ենթակա գործակալությունների ֆիրմային ձևաթղթերի, ճաշարաններում դրոշմված անձեռոցիկների, Սենատի հաստատված պաշտոնյաների բաճկոնների վրա տարբերանշանների, ինչպես նաև խանութներում հուշանվերների փոխարինում։
Ըստ Politico-ի տեղեկությունների՝ սեպտեմբերի 5-ին նախագահ Դոնալդ Թրամփի ստորագրած հրամանագիրը հիասթափություն, զայրույթ և տարակուսանք է առաջացրել Պենտագոնի շատ աշխատակիցների շրջանում։ Նրանք գտնում են, որ այս որոշման իրականացումը կարող է միլիարդավոր դոլարների ծախս պահանջել կոսմետիկ փոփոխությունների համար, որոնք գործնականում չեն նպաստի ռազմական առավել հրատապ խնդիրների լուծմանը։
Հաղորդվում է, որ Պենտագոնի պաշտոնական անվանափոխության համար, ամենայն հավանականությամբ, կպահանջվի համապատասխան օրենքի ընդունում Կոնգրեսում։
