Անկարան կշարունակի աջակցել Ադրբեջանի և Հայաստանի միջև հարաբերությունների կարգավորմանը․ Թուրքիայի փոխնախագահ

Թուրքիան կշարունակի աջակցել Ադրբեջանի և Հայաստանի միջև հարաբերությունների կարգավորման գործընթացին։ Այս մասին սոցցանցի իր էջում գրել է Թուրքիայի փոխնախագահ Ջևդեթ Յըլմազը՝ ամփոփելով Ադրբեջանի աշխատանքի և  սոցիալական պաշտպանության նախարար Անար Ալիևի հետ հանդիպումը։

«Մենք ուրախ ենք եղբայրական Ադրբեջանի հետ մեր համագործակցությունը շարունակել ամրապնդել համատեղ հանձնաժողովների նիստերի միջոցով։ Մեր հարաբերությունները, որոնք բարձրացվել են Շուշիի հռչակագրով դաշնակցային մակարդակի, բացում են նոր հորիզոններ տնտեսության, սոցիալական քաղաքականության և տարածաշրջանային համագործակցության ոլորտներում։ Օգոստոսի 8-ին Վաշինգտոնում ձեռնարկված պատմական քայլից հետո Հարավային Կովկասում երկարատև խաղաղության և կայունության մեր հույսերն է՛լ ավելի են ամրապնդվել։ Մենք շարունակելու ենք աջակցել տարածաշրջանային խաղաղության գործընթացին և Ադրբեջանի ու Հայաստանի միջև հարաբերությունների կարգավորմանը»,- գրել է Յըլմազը X-ի իր միկրոբլոգում։

Թուրք պաշտոնյան նշել է, որ Անկարայի նպատակն է՝ նպաստել մեր տարածաշրջանում խաղաղության, կայունության և բարգավաճման հաստատմանը։

Հավելենք, որ Թուրքիայի նախագահ Ռեջեփ Թայիփ Էրդողանն էլ հայտարարել էր, որ օգոստոսի 8-ին Վաշինգտոնում  «Սպիտակ տանը ստորագրությունները, անկասկած, արագացրել են Հայաստան-Ադրբեջան հարաբերությունների կարգավորման գործընթացը»։ Ըստ նրա՝ Ադրբեջանն ու Հայաստանը զգալիորեն հաղթահարել են խաղաղության ճանապարհին առկա խոչընդոտները և հասել են վերջնական փուլին։

Նա նաև հայտարարել էր, թե, այսպես կոչված, «Զանգեզուրի միջանցքի» հարցի վերաբերյալ որևէ խնդիր կամ տարաձայնություն չկա։

Թարգմանությունը՝ Էմմա Չոբանյանի