28.06.2026 | 08:39
Բասկետբոլի Հայաստանի հավաքականը հաղթեց Իռլանդիային. ՏԵՍԱՆՅՈՒԹ
Ռուսական ադամանդի ընկերությունը Հայաստանի միջոցով շրջանցում է ԵՄ պատժամիջոցները․ Bild
Քաղաքականություն
02.09.2025 | 19:22
Չնայած ԵՄ խիստ պատժամիջոցներին՝ ռուսական ադամանդները շարունակում են իրենց ճանապարհը գտնել դեպի եվրոպական շուկա: Ռուսաստանից թանկարժեք քարերի ներմուծման արգելքը գործում է 2024 թվականի հունվարից, սակայն Կրեմլը բարդ մեթոդներ է օգտագործում առևտրային սահմանափակումները շրջանցելու համար՝ իր ռազմական ծրագրերը իրականացնելու համար, գրում են գերմանական լրատվամիջոցները։
Arctida ցանցի կողմից անցկացված հետաքննությունը, որը ներկայացնում է գերմանական Bild-ը, բացահայտում է բարդ համակարգ, որն օգտագործվում է Մոսկվայի կողմից արևմտյան պատժամիջոցները շրջանցելու համար: Դրա հիմքում ընկած է ռուսական պետական «Ալռոսա» ընկերությունը, որը վերահսկում է երկրի ադամանդի արտադրության գրեթե ամբողջ ծավալը: Խճճված առևտրային ուղիներով և քողարկված կորպորատիվ կառուցվածքներով արժեքավոր հումքը շարունակում է հասնել Եվրոպայի ոսկերչական կենտրոններ:
Այս բիզնեսից ստացված եկամուտները, ըստ երևույթին, ուղղակիորեն հոսում են Ռուսաստանի գանձարան՝ այդպիսով նաև ֆինանսավորելով Ուկրաինայի դեմ պատերազմը:
Նշվում է, որ պետական «Ալռոսա» ադամանդի ընկերությունը վերահսկում է Ռուսաստանի թանկարժեք քարերի արտադրության 97 տոկոսը և սերտ կապեր ունի զինվորականների հետ։
Ըստ հետաքննության՝ պատժամիջոցների տակ գտնվող չմշակված ադամանդները բարդ ճանապարհով են գնում դեպի Եվրոպա։ Սկզբում դրանք հասնում են Հայաստան, որը Ռուսաստանի դեմ առևտրային սահմանափակումներ չի կիրառել։ Կովկասյան երկրում քարերը մշակվում և հղկվում են՝ կարևորագույն քայլ, որը պաշտոնապես զրկում է դրանց ռուսական ծագումից, ասվում է հրապարակման մեջ։
Հայաստանից ապրանքները տեղափոխվում են Հնդկաստան, Չինաստան կամ Միացյալ Արաբական Էմիրություններ: Այս միջանկյալ կանգառները ծառայում են մատակարարման շղթան ավելի թաքցնելուն։
Վերջնական նպատակակետը հաճախ բելգիական Անտվերպեն քաղաքն է՝ Եվրոպայի ադամանդի կենտրոնը: Բելգիայի իշխանությունները 2024 թվականի մարտին այս իրավիճակին արձագանքել են վեց խուզարկություններով և ձերբակալել չորս կասկածյալի՝ պատժամիջոցների հնարավոր խախտման համար:
Թարգմանությունը՝ Էմմա Չոբանյանի
