23.06.2026 | 22:01
Պայթյուն Թուրքիայի զինամթերքի պահեստներից մեկում. կան զոհեր
Էրդողանը հայտարարել է, որ Պուտինը և Զելենսկին դեռ պատրաստ չեն երկկողմ հանդիպման
Քաղաքականություն
02.09.2025 | 20:22
Թուրքիայի նախագահ Ռեջեփ Թայիփ Էրդողանը հայտարարել է, որ Ռուսաստանի և Ուկրաինայի առաջնորդները «դեռ պատրաստ չեն» դեմ առ դեմ հանդիպելու՝ պատերազմի դադարեցումը քննարկելու համար։ Այս մասին հայտնել է Reuters-ը, որին վկայակոչում է Turkish Minute-ը։
Չինաստանից վերադառնալիս լրագրողների հետ զրույցում Էրդողանն ասել է, որ այս հարցը բարձրացրել է Ռուսաստանի նախագահ Վլադիմիր Պուտինի հետ Տյանցզինում Շանհայի համագործակցության կազմակերպության գագաթնաժողովի շրջանակում հանդիպման, իսկ ավելի ուշ՝ Ուկրաինայի նախագահ Վլադիմիր Զելենսկիի հետ հեռախոսազրույցի ժամանակ։
Նա նշել է, որ վերջին ամիսներին Ստամբուլում տեղի ունեցած բանակցությունները ցույց են տվել, որ խաղաղության ճանապարհը բաց է մնում, բայց կողմերը պատրաստ չեն առաջնորդների գագաթնաժողովին։
Թուրքիան կողմ է «բանակցությունների մակարդակի աստիճանական բարձրացմանը», որպեսզի խաղաղության հույսերը վերածվեն կոնկրետ արդյունքների, հավելել է Էրդողանը՝ ընդգծելով, որ ցանկացած նախաձեռնություն, ի վերջո, պետք է լուծվի առաջնորդների մակարդակով։
ՆԱՏՕ-ի անդամ Թուրքիան, 2022 թվականին Ռուսաստանի կողմից Ուկրաինա ներխուժելուց ի վեր, բաց է պահել կապերը Մոսկվայի և Կիևի հետ, փորձել է միջնորդ հանդիսանալ նրանց միջև։
Վաշինգտոնում եվրոպացի առաջնորդների հետ բանակցություններից հետո ԱՄՆ նախագահ Դոնալդ Թրամփը հայտարարել է, որ հաջորդ քայլը Ուկրաինայի և Ռուսաստանի նախագահների հանդիպումն է։
Զելենսկին պնդում է, որ պատրաստ է ցանկացած պահի հանդիպել Պուտինի հետ, սակայն Ռուսաստանը բազմիցս հայտարարել է, որ նման բանակցությունները պահանջում են նախ հրադադարի պայմանների և խաղաղության ուղու շուրջ համաձայնություն։
Թարգմանությունը՝ Էմմա Չոբանյանի
